Framboðslisti Sjálfstæðisflokksins fyrir komandi bæjarstjórnarkosningar liggur nú fyrir. Raðað var í öll efstu sæti listans með prófkjöri en 12 efstu sæti listans eru byggð  niðurstöðu gríðarlega vel heppnaðs prófkjörs, þar sem nærri 1200 kjósendur í Eyjum komu að því að stilla frambjóðendum upp á listann með vali sínu í prófkjörinu.

1178 kjósendur skipuðu eiginlega kjörnefnd

Oft er kallað eftir því að persónukjör sé viðhaft í kosningum en prófkjör er ekkert annað en persónukjör og þær persónur sem þar bjóða sig fram eru kosnar beint af fólkinu sem tekur þátt með því að greiða atkvæði sitt.

Stundum er það gagnrýnt að fámennur hópur fólks innan flokka, svokölluð kjörnefnd , uppstillingarnefnd eða jafnvel elíta,  sjái um að velja og stilla upp fólki á framboðslista fyrir kosningar. Því er ekki til að heilsa varðandi uppstillingu á lista Sjálfstæðisflokksins í Eyjum fyrir komandi kosningar því í hinni eiginlegu “kjörnefnd” að þessu sinni sátu 1178 kjósendur af kjörskrá í Eyjum. Þeir sáu um það verk að raða frambjóðendum í sæti á framboðslistanum.

Einungis eitt framboð færir þetta vald til kjósenda

Sjálfstæðisflokkurinn er eini flokkurinn, eina framboðið, hér í Eyjum sem gefur bæjarbúum, almennum kjósendum, beint tækifæri til að raða upp framboðlistanum. Enginn annar flokkur eða framboð veitir kjósendum slíkt umboð til að stilla upp frambjóðendum á lista.

Allir kjósendur í Eyjum, gátu í raun tekið þátt í prófkjörinu og þannig haft áhrif á hvernig frambjóðendur myndu skipast á framboðslistann. Í heildina voru 1672 á kjörskrá, í lok kjördags, og af þeim greiddu 1178 atkvæði eða 70,5% þeirra sem á kjörskrá voru, sem er gríðarlega góð kjörsókn í prófkjöri.

Framboðslisti með þétt bakland frá kjósendum

Í lok kjördags lágu afgerandi úrslit fyrir og efstu sæti framboðslistans voru ákveðin. Kjósendur í Eyjum sáu um að stilla frambjóðendum í þessi sæti með atkvæðum sínum. Niðurstaðan var, eins og við mátti búast, sterkur framboðslista með góðri blöndu af fólki með mikla reynslu og öðru óreyndara, en allir með þétt  bakland og stuðning frá kjósendum í Eyjum í kjölfar prófkjörsins.

D-listinn fer bjartsýnn og jákvæður inn í kosningabaráttuna

Kosningabaráttan fer nú af stað og fer D-listi Sjálfstæðisflokksins bjartsýnn og jákvæður inn í þá baráttu með það að leiðarljósi að horfa til framtíðar í öflugri uppbyggingu á öllum sviðum sem koma samfélaginu í Eyjum til góða. Mörg stór verkefni bíða nýrrar bæjarstjórnar og stærstu hagsmunamálin snúa eins og oft áður að því að ná samkomulagi við ríkisvaldið svo það komi að málum eins og eðlilegt og nauðsynlegt verður að teljast.

Kostnaður vegna vatnsleiðslu eitt af stóru málunum sem bíða

Það er af mörgu að taka í stórum málum sem skipta miklu fyrir okkur íbúa í Eyjum en líklega er stærsta fjárhagslega hagsmunamál Vestmannaeyjabæjar og íbúa hér að ná samkomulagi við ríkisvaldið um kostnaðarþátttöku vegna nýrrar vatnsleiðslu sem við höfum lagt áherslu á að sé almannavarnamál.

Það verk hefur verið í vinnslu undanfarin misseri og er enn ekki lokið. Því mun skipta miklu í framhaldinu að þeir sem að því máli hafa unnið, sem og öðrum stórum hagsmunamálum, fyrir hönd Eyjamanna hafi þá þekkingu, reynslu og sambönd sem þarf  til að árangur náist.

Góð kosning veitir sterkt umboð

Kjósendur í Eyjum fengu í prófkjöri Sjálfstæðisflokksins að  velja það fólk sem það treystir best að leiða þessa vinnu sem og vinnu við  önnur hagsmunamál okkar Eyjamanna. Ég trúi því að kjósendur í Eyjum muni fylgja eftir þessu vali sínu á frambjóðendum á lista Sjálfstæðisflokksins með því að fylkja sér á bak við þau í komandi bæjarstjórnarkosningum og greiða þeim atkvæði sitt með því að setja X við D í kosningunum 16. maí nk.

Þannig munu kjósendur veita því fólki, sem það valdi á framboðslistann í prófkjörinu, sterkt umboð til að leiða þau mörgu og mikilvægu verkefni sem bíða nýrrar bæjarstjórnar.

Grímur Gíslason

Greinarhöfundur er fomaður fulltrúaráðs sjálfstæðisfélaganna í Eyjum.