Herjólfur ohf. birtir í dag stöðuuppfærslu þar sem farið er yfir þær fjölmörgu áskoranir sem félagið hefur staðið frammi fyrir það sem af er ári. Þar er meðal annars fjallað um erfiða stöðu í Landeyjahöfn, bilun í rafmótor Herjólfs og langvarandi truflanir á bókunarkerfi félagsins eftir bruna í gagnaveri í Hollandi.

Í tilkynningunni sem Ólafur Jóhann Borgþórsson, framkvæmdastjóri skrifar undir segir að undanfarna daga hafi verið hægt að sigla skerta áætlun til Landeyjahafnar, en enn vanti talsvert upp á að nægilegt dýpi sé komið í höfnina. Þá sé veðurspá næstu daga óhagstæð fyrir áframhaldandi dýpkun, þó unnið verði áfram um leið og færi gefist.

Einnig kemur fram að rafmótorinn sem bilaði í síðasta mánuði hafi verið sendur til Hollands í viðgerð og að gert sé ráð fyrir að viðgerðin taki um sjö vikur. Herjólfur verði tekinn úr áætlun í nokkra daga þegar mótorinn verði settur aftur í skipið. Þá segir að enn sé óljóst hvort Herjólfur III geti leyst af, þar sem Vegagerðin vinni enn að því að fá haffærniskírteini fyrir skipið.

Einnig er farið yfir stöðuna á bókunarkerfinu sem varð óvirkt eftir eld í gagnaveri í Hollandi. Vegna þess þurfi nú að færa allar bókanir inn handvirkt sem taki mikinn tíma og því sé aðeins hægt að bóka í fáar ferðir í einu. ,,Við erum ósátt við hversu langan tíma það tekur að koma henni aftur í gagnið, en vonum að það taki ekki marga daga til viðbótar að fá hana í lag. Við búum því við þær aðstæður að færa allar bókanir inn handvirkt, sem er mjög tímafrekt. Þess vegna er einungis hægt að bóka í fáar ferðir í einu.”

Að lokum þakkar félagið bæði starfsfólki og farþegum fyrir þolinmæði og samstöðu á krefjandi tímum og biðst velvirðingar á þeim óþægindum sem skapast hafa. Þar segir jafnframt að vonir standi til þess að með hækkandi sól fari ástandið að lagast.