„Kæru vinir Eins og flest ykkar eflaust vita þá hef ég átt í baráttu við þennan fjárans vírus sem herjar á samfélög heimsins.“ Svona hefst færsla sem Arnar Richardsson ritaði á facebook síðu sína í gærkvöldi en þar rekur hann baráttu sína við veikindin. Þann 22. mars greinist Arnar með Covid-19 vírus og var búinn að vera veikur í tvo daga, en áður hafði hann haft einkenni í c.a. 10 daga.

Er með Astma
„Ég er fyrir með Astma og í fyrstu var þetta bara hefðbundin hósti eins og ég er vanur að fá en 20 mars fór þetta versnandi. Ég var töluvert veikur í 6 daga mikill hiti, mjög mikill hósti, smá mæði og algerlega máttlaus. Ég átti erfitt með það eitt að tala og best var að liggja útaf, þegja og reyna að sofa þetta úr sér,“ segir Arnar í færslunni. „Sunnudaginn 29. mars er ég bara nokkuð hress og átti bara nokkuð auðvelt með tal og því fylgdi ekki þessi hóstaköst eins og verið hafði. Á Þessari viku hafði ég verið í sambandi við hjúkrunarfræðinga og lækna en einnig fékk ég þrjár heimsóknir frá okkar frábæru læknum og sjúkraflutningamönnum hér í eyjum sem komu og tóku stöðuna.“ Mánudaginn 30. mars þá vaknar Arnar með mikið mæði og er mjög andstuttur, Arnar fer upp á Spítala þar sem teknar eru lungnamyndir og koma þær ekki vel út, greinilegar bólgur í báðum lungum. „Í framhaldi er ég sendur í sjúkraflug til Reykjavíkur og lagður inn á deild A7 sem er deild fyrir Covid-19 sjúklinga.

Þetta fólk er einstakt
Að liggja inn á Landspítalanum deild A7 er lífsreynsla sem maður gleymir seint. Starfsfólk þar er ekki öfundsvert að vinna í þessum aðstæðum og í öllum þessum hlífðarfatnaði.“

Arnar lýsir æfingum sem hann var látinn gera á spítalanum tvær æfingar fimm sinnum á dag.
1. Anda inn um nefið, setja stút á munninn og blása 10 endurtekningar
2. Anda inn um nefið, halda andanum niðri í 3 sec og tæma hressilega 3 endurtekningar.

„Þetta er ekki erfitt dags daglega en þarna var þetta bara mjög erfitt. Eftir dvölina á A7 er mér efst í huga kærleikurinn og hugulsemin hjá Sjúkraliðum og Hjúkrunarfræðingum. Þetta fólk er einstakt, að það skuli leggja sig í hættu við það eitt að þér líði betur er ómetanlegt og hreinlega ólýsanlegt. Eins og Ragnheiður Gröndal skilgreindi orðið ÁST hjá Helga Björns = Anda, Slaka, Treysta. Þetta á svo vel við um ástandið á spítalanum, þar eru allir að reyna að ná andanum bæði sjúklingar og starfsfólkið með sínar grímur, eins þarf að slaka á þess á milli, sjúklingarnir leggja allt sitt traust á starfsfólkið sem gerir allt fyrir þig.“

Dauðans alvara
Arnar var svo fluttur aftur til Eyja í gær og er allur á batavegi og vonast til að vera fullfrískur á næstu vikum.

Arnar endar á að þakka fyrir allar kveðjurnar og vill koma þessum skilaboðum áleiðis.
„Ps. Hlýðum Víði þetta dauðans alvara.“