Það var mikið um dýrðir sunnudaginn 18. maí í Safnahúsinu. Þann dag, sem bar upp á alþjóðlega og íslenska safnadaginn, var nýr og sérútbúinn fágætissalur opnaður í Safnahúsi Vestmannaeyja. Af því tilefni var efnt til tvískiptrar dagskrár sem hófst í Ráðhúsi Vestmannaeyja með nokkrum ávörpum en hélt síðan áfram í Safnahúsinu þar sem fágætissalurinn var formlega opnaður.

Í Ráðhúsinu hóf Íris Róbertsdóttir bæjarstjóri dagskrána með því að lýsa því hversu glöð hún væri með opna hinn glæsilega fágætissal í Safnahúsinu og að loksins gætu heimamenn og gestir fengið að njóta listaverka sem hingað til hefðu verið í geymslum sem og hinna merku bóka sem nú væru einnig orðnar aðgengilegar. Hún þakkaði síðan  Ágústi Einarssyni, fyrrverandi prófessor og rektor á Bifröst, fyrir þann rausnarskap að gefa Vestmannaeyjabæ um 1.500 fágætar bækur, blöð og tímarit.

Meðal helstu perla í gjöf Ágústar eru allar útgáfur Biblíunnar frá Guðbrandsbiblíu (1584), Þorláksbiblíu (1644) og Steinsbiblíu (1728) að telja. Ágúst Einarsson flutti næst tölu þar sem hann rakti ástæður þess að hann ákvað að gefa bækurnar til minningar um föður sinn, Einar Sigurðsson athafnamann og bókasafnara. Þá ræddi Örn Hrafnkelsson landsbókavörður um mikilvægi þess að fágætisbókasöfn séu til, opin og aðgengileg utan suðvesturhornsins og rakti samstarf Bókasafns Vestmannaeyja við Landsbókasafn. Að lokum ræddi biskup Íslands, Guðrúnu Karls Helgudóttir, um mikilvægi Biblíunnar og benti þar á að Biblíusýningin sem verið væri að opna yrði eini  eini staðurinn þar sem unnt verður að sjá allar Biblíuútgáfur þjóðarinnar samankomnar á einum stað í fastri og varanlegri sýningu.

Að þessu loknu var gengið yfir í fágætissalinn í Safnahúsinu þar sem dagskráin hélt áfram. Þar tók Kári Bjarnason forstöðumaður á móti gestum og rakti aðdraganda þess að Ágústarsafn varð til. Kári benti á að enda þótt Bókasafn Vestmannaeyja væri stofnað 1862 breytti bókagjöf Ágústar fullkomlega safninu, úr því að vera eingöngu almenningsbókasafn í það að verða einnig eitt glæsilegasta fágætisbókasafn landsins. Kári gat þess að  fágætissalurinn væri þrískiptur, auk þess sem gert væri ráð fyrir aðstöðu fyrir fræðimann til rannsókna.

Í meginrými er að finna Ágústarsafnið, auk annarra fágætra bóka safnsins. Í öðru lagi væri stórt rými með  37 málverkum eftir Jóhannes Kjarval, sem mun vera stærsta safn Kjarvalsverka utan Kjarvalsstaða og Listasafns Íslands. Í þriðja lagi væri þar sérstakt herbergi þar sem átthagabækur og -blöð eru geymd, en um væru að ræða rösklega 2.000 bækur, tímarit og blöð um Vestmannaeyjar eða eftir Vestmanneyinga.  Þar prýða veggina 6 málverk eftir Júlíönu Sveinsdóttur auk 3 Íslandskorta frá því um 1570.

Að lokinni yfirferð Kára opnaði menningarmálaráðherra, Logi Einarsson fágætissalinn formlega og þakkaði gefanda sem og bæjaryfirvöldum fyrir að taka svona myndarlega á móti gjöfinni. Þá ávarpaði kirkjumálaráðherra, Þorbjörg Sigríður Gunnlaugsdóttir, samkomuna og rakti persónuleg tengsl sín við nýjustu Biblíuþýðinguna þar sem faðir hennar Gunnlaugur A. Jónsson prófessor sat í þýðingarnefndinni þegar nýjasta útgáfa hennar kom út árið 2007.

Að loknum ávörpum afhjúpuðu kirkjumálaráðherra og biskup Biblíusýninguna. Dagskráin var einstaklega vel heppnuð og eins og sjá má af myndum var hún vel sótt. Fágætissalurinn er ný sérstaða í menningarflóru Vestmannaeyja og ánægjulegt að geta sýnt Eyjabúum og gestum þeirra hin miklu verðmæti sem þar er að finna.

Opið verður um sjómannadagshelgina í dag, laugardag og á morgun, sunnudag kl. 13-17. Myndasyrpu Óskars Péturs Friðrikssonar, ljósmyndara Eyjafrétta má sjá hér að neðan.