Tveir flugmenn hafa verið sviptir flugleyfi tímabundið vegna lágflugs farþegaþotu Icelandair yfir Vestmannaeyjum þann 11. apríl síðastliðinn. Annar flugmannanna var sviptur leyfi í tvö ár en hinn í eitt ár.

Þetta kemur fram í frétt RÚV og er haft eftir Þórhildi Elínu Elínardóttur, samskiptastjóra Samgöngustofu. Ákvörðunin hefur verið send þeim flugmönnum sem málið varðar.

Flugstjóri vélarinnar, sem var í sínu síðasta flugi fyrir Icelandair þegar atvikið átti sér stað, var sviptur flugleyfi í 24 mánuði. Flugmaðurinn sem flaug með honum var sviptur leyfi í 12 mánuði. Sá hefur ekki fengið að fljúga á meðan rannsókn málsins stóð yfir.

Flugmennirnir geta kært ákvörðun Samgöngustofu til innviðaráðuneytisins. Ekki liggur fyrir hvort þeir hafi nýtt sér þann rétt. Samgöngustofa hefur enn ekki tekið ákvörðun gagnvart Icelandair vegna málsins.

Innri rannsókn Icelandair lokið

Icelandair hefur jafnframt lokið innri rannsókn sinni á atvikinu. Guðni Sigurðsson, upplýsingafulltrúi Icelandair, staðfesti það í skriflegu svari við fyrirspurn RÚV.

Niðurstöður innri rannsókna félagsins séu trúnaðarmál, en markmið þeirra sé ávallt að auka öryggi. Í skýrslunni komi meðal annars fram tillögur sem miði að því.

Lágflug vélarinnar vakti mikla athygli í Vestmannaeyjum og skaut mörgum bæjarbúum skelk í bringu. Atvikið náðist á myndbönd sem fóru víða á samfélagsmiðlum.

Hér má sjá myndband af vélinni fljúga yfir Heimaey.