​Ég var að renna yfir skýrslu Jóhanns Halldórssonar um hugsanlega uppbyggingu á stórskipaviðlegukanti á Eiðinu og hafði bara gaman af, vonandi verður málið að veruleika, en þetta rifjaði upp fyrir mér ansi margar greinar sem ég hef skrifað í gegnum árin og meðal annars fyrsta framboðið mitt, en ég tók þátt í framboði sem hét Frjálslyndir og óháðir fyrir bæjarstjórnarkosningarnar 2006 og settum við sem lykil baráttumál uppbyggingu á stórskipaviðlegukanti á Eiðinu. Bæði Vestmannaeyjalistinn (forveri Eyjalistans) og Sjálfstæðisflokkurinn tóku málið upp og bjuggu til gríðarlega flottar auglýsingar um þetta mikilvæga mál, unni svo kosningarnar og gerðu ekkert meira í málinu.

En vissulega hefur þetta mál verið lengi á döfinni og mikilvægi þess oft rætt, en í skýrslunni kemur m.a. fram að hin mikla uppbygging á hinu gríðar mikilvæga fyrirtæki, Laxey, fyrir okkur Eyjamenn spili þarna inn í, en einnig er nefnt (og tengi ég það við grein sem ég skrifaði í fyrrasumar) að þarna sé komin flóttaleið í einhvers konar náttúruvá. Augljóslega hefur stærsta áskorunin í þessu verkefni verið að finna efni í það, en mér skilst að það sé komið vel á veg en mér langar svona að gefnu tilefni að tengja þetta mál við annað mikilvægt mál fyrir okkur Eyjamenn.

Að undanförnu hafa borist fregnir af því að nú sé hafinn undirbúningur að stofnun félags, bæði hér í Eyjum og uppi á landi, sem hefur það að markmiði að undirbúa og fjármagna gerð gangna á milli lands og Eyja.

Augljóslega kæmi alveg gríðarlegt efni úr slíkum göngum og myndi klárlega meira en vel duga fyrir uppfyllingu samhliða uppbyggingu á viðlegukanti fyrir Eiðinu þar sem t.d. hugsanlega væri hægt að byggja þá upp tanka fyrir geymslu á fóðri fyrir laxeldið í Laxey.

Ég hef reyndar marg oft fjallað um þau tækifæri sem hér myndu skapast með göngum, en mig langar að koma hér með 2 mikilvæg atriði.

Í fyrsta lagi þá vita það held ég allir að nú hefur Vinnslustöðin sagt upp öllum starfsmönnum í Leo fresh, en á sama tíma er Vinnslustöðin meirihluta eigandi af fiskvinnslufyrirtæki inni í Hafnarfirði, þangað sem öll ýsa sem skip fyrirtækisins koma með að landi er send til og unnin í svokallaðan flugfisk, en það gætum við að sjálfsögðu gert hér í Eyjum ef við hefðum göng.
Í öðru lagi, þá er þessi gríðarlega mikla uppbygging hjá þeim í Laxey, sem klárlega stefnir í að verða stærsta og öflugusta fyrirtækið í Vestmannaeyjum innan ekki svo langs tíma. Þar væri líka tækifæri á því að vinna hugsanlega lax bæði sem ferstan eða jafnvel í neytendaumbúðir og koma því þá líka inn á þennan svokallaða flugfiskmarkað.

Tækifærin með göngum eru því margvísleg.

Ég skora því á alla þá sem ætla að bjóða sig fram fyrir bæjarstjórnarkosningarnar í vor að hafa þetta í huga, því þetta varðar ekki bara framtíðina, því þetta er líka ákveðin framtíðarsýn.

Góðar stundir.

Georg Eiður Arnarson