Karlalið ÍBV sækir KA heim í fimmtu umferð Olísdeildar karla í handbolta í kvöld. Leikurinn fer fram í KA-heimilinu á Akureyri og hefst klukkan 18:00.

Þetta verður fyrsti leikur Eyjamanna eftir að Bergvin Haraldsson tók við sem aðalþjálfari liðsins. Erlingur Birgir Richardsson yfirgaf þjálfarateymið á dögunum og tók við þýska liðinu GWD Minden. Sigurður Bragason verður Bergvini til halds og trausts í þjálfarateyminu.

KA hefur farið vel af stað í deildinni og er í öðru sæti með sex stig eftir fjóra leiki. Akureyringar hafa unnið þrjá leiki en tapað einum.

ÍBV er í sjötta sæti með fjögur stig eftir tvo sigra og tvö töp. Eyjamenn töpuðu naumlega fyrir HK, 35–34, í síðustu umferð og freista þess að komast aftur á sigurbraut í kvöld. Með sigri getur ÍBV jafnað KA að stigum.

Þrír leikir eru á dagskrá Olísdeildarinnar í kvöld. Auk viðureignar KA og ÍBV mætast Haukar og Víkingur klukkan 19:00 og Fram og Afturelding klukkan 20:30. Flautað verður til leiks í KA-heimilinu klukkan 18:00.