Hákon Már Örvarsson er einn fremsti matreiðslumeistari Íslands og margverðlaunaður kokkur með víðtæka alþjóðlega reynslu. Hann hlaut bronsverðlaun í hinni virtu Bocuse d’Or keppni árið 2001, sem oft er kölluð heimsmeistarakeppni matreiðslumanna, og hefur síðan þá verið í fremstu röð í íslenskri og norrænni matargerð.

Á ferli sínum hefur Hákon starfað á Michelin-veitingastöðum, þar á meðal hjá Léa Linster í Lúxemborg, og gegnt lykilhlutverkum sem yfirkokkur á veitingastöðum á borð við Vox og Hótel Holt. Hann hefur einnig verið í fararbroddi við að kynna íslenskt hráefni á alþjóðavettvangi og tekið virkan þátt í mótun nýrrar norrænnar matargerðar.

Á MATEY sjávarréttahátíðinni mun Hákon Már elda á veitingastaðnum GOTT, þar sem hann sameinar krafta sína með yfirmatreiðslumönnum staðarins. Gestir geta átt von á skapandi og fáguðum réttum þar sem íslenskt sjávarfang nýtur sín til fulls, framreitt af einum reyndasta og virtasta kokki landsins.

Haldin dagana 22.-23.maí

Hátíðin sem er samstarfsverkefni Ferðamálasamtaka Vestmannaeyja, Visit Vestmannaeyjar, Ísfélags., Vinnslustöðvarinnar hf, Laxey og Fab Lab Vestmannaeyjar verður haldin dagana 22.-23.maí næstkomandi.