Í framhaldi af greinaskrifum hér á Eyjafréttum sem m.a. vörðuðu stöðu fjármála Vestmannaeyjabæjar höfum við hjá Eyjafréttum ákveðið að taka saman peningalegar eignir bæjarins og rifja upp söluna á um 7% hlut bæjarins í Hitaveitu Suðurnesja árið 2006. 

Bærinn var mjög skuldsettur 2006 

Samkvæmt ársreikningi árið 2006 átti bærinn einungis 120 milljónir kr í handbært fé og skuldaði 1.500 milljónir ásamt því að leigja töluvert af fasteignum til sín á þessum tíma, s.s. barnaskólann. Að teknu tilliti til þessarar leiguskuldar mætti leggja rök fyrir því að bærinn hafi skuldað um 8 milljarða á núvirði. 

• Geysir Green Energy kaupir 28,4% hlut í Hitaveitu Suðurnesja 

Geysir Green Energy keypti 28,4% hlut sveitarfélaganna í hitaveitunni árið 2007 og greiddi 15 milljarða fyrir bréfin. Vestmannaeyjabær fékk um 3,6 milljarða fyrir sinn 7% eignarhlut sem nemur tæpum 9 milljörðum að núvirði. Fjárhagsstaða bæjarins hafði því snúist rækilega við á einni nóttu og bærinn hafði nú dágóðan sjóð til framkvæmda. 

Tækifærið var nýtt til að kaupa aftur fasteignir sem seldar voru á sínum tíma til Eignarhaldsfélagsins Fasteignar ásamt því að borga niður stærstu bankalán. Ekki fékkst heimild til að borga niður eitt af bankalánunum en það lán var með lokagjalddaga í fyrra og var þá bærinn loksins skuldlaus. 

Elliði Vignisson þáverandi bæjarstjóri sagði um söluna á þessum tíma: „Vestmannaeyjabær er afar sáttur við söluna. Við höfum alla tíð lagt áherslu á góða þjónustu við bæjarbúa og teljum það hlutverk okkar að haga fjárfestingum sveitarfélagsins í samræmi við það. Um leið og þessi sala gefur Vestmannaeyjabæ aukin tækifæri til að ráðast í þarfar framkvæmdir sem auka enn þjónustu við bæjarbúa verður áhersla áfram lögð á hagræðingu og aðhald í rekstri.” 

Sjóðurinn úr fjórum í einn milljarð 

Við sölu á hlutafé bæjarins á 7% hlut í hitaveitunni varð til myndarlegur sjóður sem hefur nýst til margvíslegrar framkvæmda og hefur vaxið og dregist saman. Þannig stækkaði sjóðurinn úr 1,5-2 milljörðum á núvirði í tæpa 4 milljarða á 6-7 árum en bærinn skilaði góðri afkomu á tímabilinu. Í dag reiknum við hjá Eyjafréttum að sjóðurinn sé rúmlega einn milljarður. 

Bærinn hefur lagt í margvíslegar framkvæmdir frá sölu hitaveitunnar, s.s. knattspyrnuhúsið, bætt útisvæði í sundlauginni, Eldheimar, búningsaðstaða við Hásteinsvöll, Ægisgötu, nýja slökkviliðsstöð, endurbætur á Ráðhúsinu og nú er í burðarliðnum listaverk á Eldfelli. 

Sjóðurinn, og sú ávöxtun sem fjármagnið hefur gefið, hefur því nýst vel á síðustu 20 árum við fjölbreytta uppbyggingu en Eyjafréttir tóku í fyrra saman kostnað við nýjustu framkvæmdir.  

• 670 milljónir í Ráðhúsið  – Eyjafréttir 

• 212 milljónir í búningsklefa – leiðrétt – Eyjafréttir 

• 533 milljónir í slökkvistöðina – Eyjafréttir