Karlalið ÍBV í fótbolta tók á móti Þrótti Reykjavík í 32-liða úrslitum Mjólkurbikarsins í Eyjum í dag. Þróttur bar sigur úr býtum eftir vítaspyrnukeppni.

Lokatölur eftir venjulegan leiktíma var 2-2 en Þróttur komst tvívegis yfir í leiknum. Adam Árni Róbertsson kom Þrótti yfir á 28. mínútu leiksins þegar hann stangaði hornspyrnu Sigurðar Egils Lárussonar í netið. Staðan 0-1 í hálfleik. 

Sigurður Arnar Magnússon jafnaði leikinn fyrir Eyjamenn í upphafi síðari hálfleiks eftir klafs í teig Þróttar. Það tók Þróttara ekki langan tíma að komast aftur yfir en aðeins tveimur mínútum eftir að Eyjamenn jöfnuðu var Adam Árni aftur á ferðinni fyrir Þrótt. Hann fékk þá sendingu inn á teig ÍBV og kláraði færið af mikilli yfirvegun. Eyjamenn þurftu að bíða eftir jöfnunarmarkinu en það kom á 84. mínútu þegar varamaðurinn Róbert Elís Hlynsson skallaði boltann í netið eftir frábæra sendingu Vicente Valor. Staðan eftir venjulegan leiktíma 2-2 og því þurfti að framlengja.

Hvorugt liðið náði að skora í framlengingunni og því þurfti vítaspyrnukeppni til að knýja fram sigurvegara. Þróttarar höfðu betur en Þórhallur Ísak Guðmundsson, markvörður Þróttar, var hetja leiksins með tvær markvörslur. Þróttur skoraði úr fjórum spyrnum en Eyjamenn aðeins tveimur.

Þróttur Reykjavík er því komið áfram í 16-liða úrslit Mjólkurbikarsins en Eyjamenn sitja eftir með sárt ennið.