Klæðning Eldheima er á köflum verulega illa farin og hafa nú verið hafnar aðgerðir til að fjarlægja þá hluta sem verst standa. Frá þessu er greint á vef Vestmannaeyjabæjar.

Bent á áskoranir strax í upphafi

Byggingu Eldheima lauk árið 2014 og var húsið lokaverkefni arkitektsins Margrétar Kristínar Gunnarsdóttur í arkitektanámi hennar í Árósum. Ytra byrði byggingarinnar var klætt með Corten-stáli, sérblönduðu stáli sem myndar yfirborðspatínu (ryðhúð) sem á að verja efnið gegn frekari tæringu.

Við hönnun var þó bent á að Corten-stál gæti reynst viðkvæmt í saltbornu sjávarlofti, líkt og því sem ríkir á Vestmannaeyjum. Saltrok og ágjöf í hvössu veðri geta haft bein áhrif á endingu efnisins.

Áætluð ending Corten-stáls eftir aðstæðum:

• Beint útsett fyrir sjávarseltu og ágjöf: 5–15 ár

• Skjólgott, vel loftræst og hreinsað með regnvatni: 15–30 ár

• Inn í landi með lítið saltmagn í lofti: 30+ ár

Tímabundin vörn sett upp

Klæðningin er verst farin á norður- og vesturhliðum hússins, þar sem álagið er mest. Skemmdir hlutar hafa verið fjarlægðir og krossviður settur upp til bráðabirgða yfir veturinn. Í framhaldinu verður unnið að varanlegum úrbótum, sem ætlað er að tryggja öryggi og ásýnd byggingarinnar til framtíðar.