Sjómannadagurinn var haldinn hátíðlega um land allt í gær og sjómönnum fagnað. Mikil og skemmtileg dagskrá var í boði hér í Eyjum og var sjómönnum fagnað yfir helgina. Við hjá Eyjafréttum náðum tali af nokkrum konum sjómanna og fengum að spyrja nokkurra spurninga varðandi fjölskyldulífið.

Nafn: Þórdís Gyða Magnúsdóttir

Aldur? 37 ára.

Fjölskylda? Baldvin Þór, Anna Rakel, Sigrún Arna og Selma Björk.

Hversu lengi hefur þú verið sjómannsfrú? Hef verið sjómannsfrú síðan 2011.

Á hvaða skipi er maki þinn? Hann er á því flotta skipi Sigurði Ve 15.

Kynnist þið þegar maki er á sjó? Nei við kynnumst 2009 þegar hann er að klára smiðjuna í Héðni í Reykjavík.

Hefur maki þinn alla ykkar tíð verið á sjó? Nei en hann byrjaði ungur á sjó eða um 2001, var þar af og til þangað til hann byrjaði í fullu starfi 2011.

Hvernig hefur gengið að samræma sjómennsku og fjölskyldulíf? Það gengur oft á tíðum vel, en á móti missa þeir af stórum stundum í lífinu hjá okkur fjölskyldunni og það getur tekið á alla, bæði okkur og hann.

Helstu kostir sjómennskunnar? Hann er í stórkostlegri áhöfn þar sem bæði menn og makar ná ofsalega vel saman. Hann elskar starfið sitt og er stoltur sjómaður.

Helstu gallar sjómennskunnar? Þegar hann missir af stóru stundunum í okkar lífi og að geta ekki tekið frí þegar það hentar og á við.

Eruð þið með hefð um sjómannahelgina? Við höfum síðustu ár farið á föstudeginum með vinum okkar út að borða og á tónleikana upp í höll, tekið svo laugardaginn niður á bryggju með stelpunum og með áhöfninni um kvöldið í höllinni. Svo endar maður alltaf á stakkó á sunnudeginum.

Eitthvað að lokum? Til hamingju með helgina sjómenn og sjómannskonur.