Segja má að hápunktur kosningabaráttunnar í Vestmannaeyjum hafi verið opinn kosningafundur Eyjafrétta í Eldheimum í gær, sem Tryggvi Már Sæmundsson ritstjóri stýrði af öryggi með góðri aðstoð Anniku Vignisdóttur, aðstoðarritstjóra.

Á annað hundrað manns mætti á fundinn þar sem fulltrúar framboðanna þriggja sátu í pallborði. Frá D-lista Sjálfstæðisflokksins mættu Eyþór Harðarson og Íris Róbertsdóttir, frá E-lista Eyjalistans Arndís María Kjartansdóttir og Anton Björnsson og frá M-lista Miðflokksins Jón Þór Guðjónsson og Sæunn Magnúsdóttir. Hér má sjá upptöku frá fundinum.

Framboðin hafa sjálf verið dugleg að kynna sig og þau málefni sem þau standa fyrir. Óskar Pétur Friðriksson hefur fylgst með því helsta og birtum við nokkrar myndir frá þeim viðburðum sem boðið hefur verið upp á alla vikuna. Ekki er seinna vænna því kosið verður á morgun.