Fjölskylduganga um Stórhöfða markaði lok Íþróttaviku Evrópu í Vestmannaeyjum sunnudaginn 27. september. Vestmannaeyjabær bauð til göngunnar undir leiðsögn Eyrúnar Haraldsdóttur og lék veðrið við þátttakendur, með logni á einum vindasamasta stað landsins.

Í frásögn á vef Vestmannaeyjabæjar kemur fram að hópurinn hafi byrjað á að líta inn í fuglaskoðunarhúsið. Þar sást hvorki til lunda né flækingsfugla. Að því loknu var gengið eftir slóða umhverfis höfðann og appelsínugulum stikum fylgt.

Börnin sýndu Stórhöfða, smáeyjunum í kring og öðru sem fyrir augu bar mikinn áhuga. Við húsið á Stórhöfða var tekin nestispása áður en síðasti spölurinn var genginn. Fram kemur í fréttinni að börnin hafi verið dugleg að drífa foreldra sína áfram og luku allir göngunni með bros á vör. Hér má sjá fleiri myndir úr höfðanum.