Eyjafréttir standa fyrir opnum framboðsfundi vegna sveitarstjórnarkosninganna 2026 í Eldheimum fimmtudaginn 14. maí kl. 17:00. Húsið opnar kl. 16:45.

Á fundinum munu fulltrúar frá framboðunum þremur í Vestmannaeyjum – Eyjalistanum, Miðflokknum og Sjálfstæðisflokknum – kynna áherslur sínar og svara spurningum fundargesta.

Markmið fundarins er að skapa vettvang fyrir opnar, málefnalegar og upplýsandi umræður í aðdraganda sveitarstjórnarkosninganna. Fundargestum gefst kostur á að leggja fram hnitmiðaðar spurningar til frambjóðenda auk þess sem framboðin fá tækifæri til að bera fram spurningar sín á milli.

Dagskráin verður með þeim hætti að einn fulltrúi frá hverjum lista fær fyrst allt að fimm mínútur til að kynna sitt framboð. Að því loknu taka við spurningar milli framboða og síðan opnar umræður með þátttöku fundargesta. Fundinum lýkur með stuttum lokaorðum frá framboðunum.

Eyjafréttir hvetja Vestmannaeyinga til að mæta og taka þátt í málefnalegri umræðu um framtíð samfélagsins.