Mosfellska hljómsveitin Kaleo hefur verið að gera það gott síðustu ár. Árið 2021 gáfu þeir félagar út myndband við lagið sitt Break My Baby. Myndbandið við lagið er ekki beint tekið upp í alfaraleið en tökustaðurinn er þyrlupallurinn í Þrídröngum. Þegar þetta er ritað hafa tæplega 3,4 milljónir séð myndbandið.

Þrídrangar eru í raun fjórir drangar, sem standa um 10 km vestur af Heimaey. Stóridrangur eða Háidrangur sem er stærstur, um 40 m hár og gróðurlaus. Örskammt frá Stóradrang er Þúfudrangur og Klofadrangur og sá fjórði er líklega nafnlaus.

Eyjamenn fóru ekki oft út í Þrídranga sökum þess hversu langt er að fara, en Austur-Landeyingar fóru gjarnan þangað til þess að nýta söl og stunda selveiði. Árið 1939 var reistur viti á Stóradrangi og mikið þrekvirki unnið við byggingu vitans. Við hinn glæsilega vita er þyrlupallur og er þessum mannvirkjum vel haldið við.