Vestmannaeyjaskipin Vestmannaey VE og Bergey VE landa bæði góðum afla í dag. Vestmannaey landar 65 tonnum af karfa í Grindavík en Bergey landar fullfermi í Vestmannaeyjum, aðallega ýsu, að því er segir í frétt á heimasíðu Síldarvinnslunnar.

Birgir Þór Sverrisson, skipstjóri á Vestmannaey, segir túrinn hafa gengið vel.

„Þetta er mest gullkarfi sem við erum með. Aflinn fékkst að mestu í Skerjadýpinu og á Sparisjóðnum en við enduðum síðan á Eldeyjarbankanum. Þetta er þriðji túrinn hjá okkur eftir sumarstopp en við lönduðum fullfermi af ýsu í Eyjum á sunnudaginn. Ýsuna fengum við á Brekableiðunni. Veiðin eftir að sumarstoppinu lauk hefur verið býsna góð og menn hér um borð eru bara sáttir,“ segir Birgir Þór.

Jón Valgeirsson, skipstjóri á Bergey, lætur einnig vel af veiðunum.

„Við vorum að koma úr fyrsta túrnum okkar eftir sumarstopp og hann gekk býsna vel. Við fórum út á sunnudag og veiddum fyrst ýsu á Brekableiðunni. Síðan var farið á Pétursey og Vík þar sem fékkst ýsa í bland við þorsk. Þetta gekk alveg ágætlega og veðrið var gott megnið af túrnum en við fengum smávegis kaldaskít í lokin,“ segir Jón.

Bæði skip halda fljótlega aftur til veiða að löndun lokinni.