- Eyjafréttir
- ·
- Áhugavert
- ·
Þingnefnd boðar opinn fund um stöðu samgangna til Eyja
Ritstjórn
Þann 26. apríl síðastliðinn óskaði Halla Hrund Logadóttir, þingmaður Framsóknar, eftir opnum fundi í umhverfis- og samgöngunefnd með Eyjólfi Ármannssyni, innviðaráðherra um stöðu samgangna til Vestmannaeyja og nauðsyn ferjuáætlunar fyrir landið allt. Beiðnin var samþykkt einróma á fundinum og tók ráðherra strax jákvætt í málið.
Tilefni fundarbeiðninnar er að samgöngur til og frá Vestmannaeyjum hafa raskast verulega vegna bilunar í Herjólfi og krefjandi stöðu Landeyjahafnar. Núverandi staða annar ekki samgönguþörf til og frá Eyjum. Baldur, Breiðafjarðarferjan, hefur verið kallaður til sem varaskip, sem sýnir að vandinn nær út fyrir Vestmannaeyjar og varðar ferjusamgöngur á landsvísu. Þetta ástand er ósjálfbært og skapar gríðarlega óvissu fyrir samfélagið í Vestmannaeyjum í heild, sagði m.a. í erindi þingmannsins.
Fundartími er nú staðfestur en fundurinn verður haldinn þann 18. maí kl. 15:00 og verður er í beinu streymi frá vef Alþingis. Á dögunum heimsótti Halla Hrund Vestmannaeyjar og fundaði með bæjarstjóra um málið. Hún mun einnig bjóða uppá viðtalstíma fyrir Eyjamenn í aðdraganda fundarins, en hægt er að skrá sig hér.
