Björgunarskipið Þór frá Vestmannaeyjum tók þátt í björgun karls og konu sem lent höfðu í sjálfheldu í Reynisfjöru síðdegis í dag.

Björgunarsveitir á Suðurlandi voru boðaðar út um hálfsexleytið eftir að fólkið hafði gengið meðfram klettum á fjöru en ekki gætt að hækkandi sjávarstöðu. Fyrstu boð bárust björgunarsveitinni Víkverja í Vík í Mýrdal en skömmu síðar voru fleiri sveitir, allt frá Kirkjubæjarklaustri að Árborgarsvæðinu, kallaðar út ásamt Þór.

Fólkið var staðsett með dróna og skömmu síðar var Þór kominn að Reynisfjöru. Víkverji kom með léttan gúmbát frá Vík og tókst að lenda honum í fjörunni skammt frá fólkinu. Áhöfn Þórs leiðbeindi því að bátnum og var það síðan flutt öruggt í Reynisfjöru. Fólkið var heilt á húfi og héldu björgunarsveitir þá heim.

Skömmu eftir útkallið í Reynisfjöru barst Landsbjörg önnur aðstoðarbeiðni vegna einstaklings í sjálfheldu á Hafnarfjalli. Björgunarsveitir á Vesturlandi voru boðaðar út og óskað var eftir aðstoð þyrlu Landhelgisgæslunnar til að flytja viðkomandi niður að bílum björgunarsveita.