Herjólfur hvetur farþega sem hyggjast ferðast á morgun, þriðjudaginn 29. september, til að fara fyrr en seinna hafi þeir tök á. Samkvæmt ölduspá fer ölduhæð hækkandi fyrir hádegi og gæti það haft áhrif á siglingar.

Þetta kemur fram í tilkynningu frá Herjólfi. Þar segir að verði breytingar á áætlun verði þær kynntar eins fljótt og hægt er.

Þá bendir spáin til þess að sigla þurfi til og frá Þorlákshöfn á miðvikudag og fimmtudag, 30. september og 1. október. Allar ferðir eru þó enn á áætlun og verða mögulegar breytingar tilkynntar um leið og þær liggja fyrir.

Farþegar eru jafnframt minntir á að á þessum árstíma sé alltaf hætta á færslu milli hafna. Því sé ekki æskilegt að skilja ökutæki eftir í Landeyjahöfn eða Þorlákshöfn.