Helgina 4.-6. október sl. fór fram fyrrihluti Íslandsmóts skákfélaga 2019-2020 í Rimaskóla í Reykjavík. Taflfélag Vestmannaeyja sendi þrjú lið á mótið, þar af eina sveit í 2. deild og tvær sveitir í 4. deild. Í fyrra var TV með tvær sveitir, eina í 3ju deild sem vann sig upp í 2. deild og eina í 4. deild. Í ljósi góðs árangurs á síðasta móti bætti TV við nýrri sveit og fara nýjar sveitir sjálfkrafa í 4. deild. Heildarfjöldi keppenda á mótinu er 300-400 manns, en tefldar voru fjórar umferðir um helgina.
Í hverri sveit hjá TV eru sex menn, en mikið reynir á varamenn og tóku alls 30 félagar í TV þátt í mótinu. Að loknum fjórum umferðum af sjö í 2. deild er sveit TV er í 2.-3. sæti ásamt b) sveit Akureyrar, en átta lið eru í deildinni.
Í 4. deild er önnur sveit TV í 2. sæti og hin í 5. sæti af 16 liðum í 4. deild. Bestum árangri á mótinu hjá TV í 4. deild náði Hallgrímur Steinsson 3,5 vinn. í 4 skákum, Sigurður Arnar Magnússon 3 vinn., fullt hús, Alexander Gautason 3 af 4 og Andri Hrólfsson 2,5 af 3 og Lúðvík Bergvinnson 2 vinn. í tveimur skákum. Í 2. deild náðu bestum árangri Þorsteinn Þorsteinsson liðstjóri 3 af 4, Örn Leó Jóhannsson 2,5 af 3 og Páll Andrason 3 af 4. Þeir þrír síðast töldu eru nýir liðsmenn, en þegar TV fór upp í 2. Deild í vor þurfti að styrkja liðið á efstu borðum , en þá var jafnframt ákveðið að vera með tvö lið í 4. deild. Að sögn Arnars Sigurmundssonar form. TV sem jafnframt var liðsstjóri TV í 4. deild ásamt Ólafi Hermannssyni er TV menn mjög ánægðir með árangurinn eftir fjórar umferðir,- en síðstu þrjár umferðirnar fara fram á á Hótel Selfossi 19.-21.mars 2020 og þá ráðast úrslitin á mótinu í heild.