Smári McCarthy, þingmaður Pírata, hefur greinst með kórónuveiruna. Hann greinir frá þessu í færslu á Facebook. Smári hefur verið í sjálfskipaðri sóttkví í rúma viku eftir að hafa fengið hósta. “Ég er þokkalega hress, einkennin mjög væg, hóstinn mestmegnis farinn og hitinn varð aldrei mikill. Önnur einkenni koma og fara ─ en ég er í stuttu máli ótrúlega heppinn með hvað þetta virðist vægt.”
Auk Smára hafa sex starfsmenn Alþingis greinst með smit og gripið hefur verið til þess ráðs að herða reglur þingsins um smitvarnir.
