Guðrún Hafsteinsdóttir fyrsti þingmaður Sjálfstæðisflokksins í Suðurkjördæmi gerði samgöngur við Vestmannaeyjar að umræðuefni í ræðustól Alþingis í gær. Þar kemur hún inná þá stöðu sem skapaðist í samgöngum við Vestmannaeyjar í síðustu viku og skort á flugi milli lands og Eyja. Ræðuna í heild sinni má sjá hér að neðan:
Virðulegi forseti. Ég tel mig knúna til að benda hér á þá grafalvarlegu stöðu sem er í samgöngumálum Vestmannaeyinga. Það voru margir Eyjamenn sem hlökkuðu mikið til í síðustu viku, enda haustfrí í skólum að hefjast og margir hugðu á ferðalög og langa helgi. Börnin hlupu heim úr skólanum á fimmtudag full eftirvæntingar, enda ætluðu margir upp á land sama dag. En þegar síst skyldi bilaði Herjólfur og siglingar lágu niðri. Eina tenging íbúa Vestmannaeyja við fastalandið bilaði og fólk komst hvorki lönd né strönd. Þetta er ekki flókið. Samgöngur til og frá Vestmannaeyjum eru ekki boðlegar eins og staðan er. Nú er siglt á gamla Herjólfi enda er sá nýi að fara í slipp. Sá gamli ristir dýpra og því er ekki hægt að sigla honum með sama hætti og þeim nýja og þess vegna fjölgar nú ferðunum í Þorlákshöfn. Og til að bæta gráu ofan á svart er ekkert áætlunarflug í boði lengur. Ekkert áætlunarflug hefur verið til Eyja síðan í lok maí á þessu ári. Innviðaráðuneytið styrkti flugið en telur ekki forsendur til að gera það áfram.
Virðulegi forseti. Við þekkjum öll sérstöðu Vestmannaeyja. Það er lágmarkskrafa íbúa eyjanna að það séu öruggar samgöngur til og frá eyjunum. Helst myndi maður vilja sjá reglulegt flug einhverja daga í viku og bind ég miklar vonir við að innan tíu ára verðum við farin að fljúga til Eyja á rafmagni. En nú þarf að bregðast við og ég skora á Vegagerðina að gera áætlun um viðbrögð þegar ekki er hægt að sigla í Landeyjahöfn. Það mætti hugsa sér að varaplanið væri að þá myndi flug taka við. Með öðrum orðum: Þegar skipið siglir ekki í Landeyjahöfn þá er gripið inn í með flugi þann tíma sem höfnin er úti.
