Tvö sýni til viðbótar hafa greinst jákvæð frá Vestmannaeyjum og eru staðfest smit á COVID-19 því orðin 59 talsins. Báðir aðilar voru þá þegar í sóttkví og eru nú í einangrun. Fjöldi þeirra sem settir hafa verið í sóttkví er 594 og 217 hafa lokið sóttkví. Þá er þremur batnað. Enn eru tafir á vinnslu hjá LSH og því er ekki hægt að rýna mikið í fjölda jákvæðra smita síðustu daga og draga af þeim ályktanir.
Upplýst er að ákvarðanir aðgerðastjórnar um hertar aðgerðir gilda að minnsta kosti fram yfir páska eða til og með 13. apríl nk. Í hertum aðgerðum felst samkomubann miðað við 10 manns, bann við aðgengi að íþróttamannvirkjum og líkamsræktarstöðvum, starfsemi þar sem er mikil nálægð og íþróttastarfsemi þar sem nálægð er minni en tveir metrar ofl. Íbúar eru beðnir um að halda sig eins mikið heima og mögulegt er og eru beðnir um að ferðast ekki upp á fasta landið nema nauðsyn krefji.
Næstu tvær vikur eru afar mikilvægar í baráttunni við útbreiðslu sjúkdómsins. Styðjum hvort annað og förum eftir þessum reglum, þær eru settar ykkur og okkur öllum til heilla.
Aðgerðastjórn
