Aðgerðastjórn hefur lokið störfum

Tilkynning frá aðgerðastjórn

Páley Borgþórsdóttir, aðgerðastjóri og lögreglustjóri Vestmannaeyja

Með gleði og sól í hjarta tilkynnum við að aðgerðastjórn hefur lokið störfum og við tekur reglubundið starf almannavarnanefndar. Aðgerðastjórn hefur fundað reglulega frá 15. mars og yfirleitt daglega. Engin smit hafa verið greind í Eyjum síðan 20. apríl svo enn er heildarfjöldi smita 105. Öllum er batnað en nokkrir eru í sóttkví sem voru að koma erlendis frá. Neyðarstigi hefur verið aflétt í landinu og er nú unnið á hættustigi almannavarna, það eru góðar fréttir.

Aðgerðir okkar hér í Vestmannaeyjum vegna COVID-19 gengu vonum framar og eins og áður hefur verið nefnt er það ekki síst að þakka skilningi og þátttöku íbúa samfélagsins. Við viljum þakka íbúum, fyrirtækjum, stofnunum og þjónustuaðilum fyrir einstaka samvinnu og þann samhug sem allir sýndu í verki. Án þessarar samstöðu hefði aðgerðin ekki gengið eins vel.

Gætum að eigin sóttvörnum og eigin heilsu, það gildir nú sem fyrr.
Lifið heil.

f.h. aðgerðastjórnar
Páley Borgþórsdóttir, aðgerðastjóri.

Mest lesið