Taflfélag Vestmannaeyja var með þrjár 6 manna sveitir á mjög fjölmennu Íslandsmóti skákfélaga 2021-2022, en seinnihluti mótsins fór fram í Fjölnishöllinni í Grafarvogi 5.-6. mars sl.
Sveitirnar þrjár skipaðar félagsmönnum TV sem ýmist eru búsettir í Eyjum eða á meginlandinu. Alls voru tefldar sjö umferðir á mótinu, en fjórar fyrstu fóru fram í október 2021. Alls tóku um 30 félagar í TV í mótinu í heild.
TV var með sveit í 1. deild sem voru átta lið. TV var í forystu allt fram í síðustu umferð og endaði að lokum með 11 stig og 26 vinninga. Sigursveit KR var aftur á móti með 11 stig og 26,5 vinning og færist hún upp í úrvalsdeild. Munurinn gat ekki orðið minni!. Ekki var reiknað með því að skáksveit TV myndi ná þetta langt og árangurinn því mjög góður. Þá var TV með sveit í 3ju deild á Íslandsmótinu þar sem liðið varð í 5.-6. sæti af átta sveitum. Þessu til viðbótar var TV með sveit í 4. deild þar sem voru 15 sveitir. Sveit TV lenti í 9. sæti af 15. sem er mjög þokkalegur árangur. Liðsstjórar TV voru Þorsteinn Þorsteinsson í 1. deild, Hallgrímur Steinsson form. TV í .3. deild og Ólafur Hermannsson í 4. deild.
Skákkennsla ungmenna á vegum TV fer fram á mánudögum kl. 17.30 og fimmtudögum kl. 17.30 í skákheimili Taflfélagsins að Heiðarvegi 9 þar sem öll aðstaða til skákkennslu og keppni er til fyrirmyndar. Sæmundur Einarsson og Guðgeir Jónsson félagsmenn í TV sjá um kennsluna.
Framundan er Skákþing Vestmannaeyja 2022 sem fer fram í skákheimili TV að Heiðarvegi 9. Teflt verður í einum flokki og er umhugsunartími á skákina 90 mínútur á hvorn keppenda auk 30 sek. á leik. Teflt verður á fimmtudögum kl. 19.30 og á sunnudögum kl. 13.00. Miðað er við að Skákþingið hefjist í lok mars eða byrjun apríl. Nánari upplýsingar gefur Sæmundur Einarsson, skákstjóri í síma 611-2284 eða á netfanginu [email protected].