Rebekka Rut Rúnarsdóttir er fædd 2007 og fer í tíunda bekk GRV á komandi skólaári. Hún er ánægð með árin níu sem hún hefur
stundað nám við skólann. Sátt við kennarana og hún hlakkar til að setjast í tíunda bekk sem markar tímamót í lífi ungmenna á Íslandi.
„Helsti kostur skólans er fjölbreytt nám og góð kennsla. Stærðfræðin er í uppáhaldi hjá mér,“ segir Rebekka og svarar játandi þegar hún er spurð hvort hún sé góð í stærðfræði. „Mér gengur líka vel í íslensku og tungumálum og danskan er allt í lagi. Stefnan er svo að ná sem bestum árangri á prófunum í vor.“
Rebekka er ánægð með félagslífið. „Árshátíðin er alltaf skemmtileg og gaman í skólaferðalögunum,“ segir Rebekka sem stefnir
á nám í FÍV að loknum tíunda bekk þar sem meira verður í boði í félagslífinu. „Ég stefni á að fara á félagsfræðibraut og að loknu stúdentsprófi langar mig að fara í lögfræði,“ segir Rebekka að endingu.
