Lúðrasveit Vestmannaeyja heldur sína árlegu hausttónleika nk. laugardag kl.16. í Hvítasunnukirkjunni.
Mikið er venjulega lagt upp úr þessum tónleikum og eru þeir jafnan hápunkturinn á starfi sveitarinnar og efnisval fjölbreytt.
Að þessu sinni ætlar Lúðrasveit Vestmannaeyja að heiðra minningu þeirra Stefáns Sigurjónssonar og Ellerts Karlssonar á tónleikunum en þeir eru báðir fyrrum stjórnendur Lúðrasveitarinnar og létust á árinu.
Stefán var stjórnandi um 19 ára skeið og var límið í starfinu allan þann tíma sem hann starfaði. Stefán átti sér nokkur uppáhaldslög sem flutt verða á tónleikunum og er óhætt að segja að það lagaval sé bæði skemmtilegt og frumlegt.
Ellert Karlsson byrjaði ungur í sveitinni og stjórnaði henni um tíma en að auki var Ellert einn helsti útsetjari lúðrasveitartónlistar á Íslandi og hafði einstakt lag á að útsetja lög lærimeistara síns, Oddgeirs Kristjánssonar. Verða flutt lög í útsetningu Ellerts.
Tónleikarnir eru svokallaðir styrktarfélagatónleikar þar sem styrktarmeðlimum er boðið á tónleikana en einnig er hægt að kaupa miða við innganginn en styrktarfélagar hafa fengið greiðslubeiðni í heimabanka.
Tónleikarnir verði laugardaginn 12.nóv nk. Kl.16.00 í Hvítasunnukirkjunni við Vestmannabraut.
Með kærri kveðju
Lúðrasveit Vestmannaeyja
