Áhöfn Þórs, björgunarskips Slysavarnafélagsins Landsbjargar í Vestmannaeyjum, var boðuð út í gærmorgun til þess að sækja smábát við Kötlutanga. Smábáturinn varð vélarvana við Kötlutanga rétt undan Vík í Mýrdal og rak undan hægum vindi. Þetta kemur fram í tilkynningu frá Landsbjörg.
Björgunarsveitin var boðuð út kl. 11 og tók um eina og hálfa klukkustund að mæta á vettvang. Dráttartaug var komið frá Þór í bátinn og síðan siglt til Vestmannaeyjahafnar.
Einn maður er um borð í smábátnum. Ekki er víst hvort hann hafi verið að strandveiðum eða að flytja bátinn á milli staða. Þór, sem er eitt nýrra björgunarskipa Slysavarnafélagsins, var fljótur á vettvang, með ganghraða hátt í 30 sjómílur. Það hamlaði heldur ekki för Þórs að sjólag var gott.