Pysjueftirlitið birti rétt í þessu lokatölur fyrir vertíðina 2023. Samtals voru 3.015 pysjur skráðar í eftirlitið í ár, þarf af 1.190 vigtaðar. Tímabilið í ár náði yfir 50 daga, sem er 14 dögum lengra en meðaltímabil síðustu 20 árin. Pysjueftirlitið hóf göngu sína árið 2003 og hefur því gögnum verið safnað í 21 ár. Síðustu 9 ár hefur pysjutíminn varað lengur en 30 daga, sem sýnir okkur að tímabilið sem pysjurnar eru að yfirgefa holurnar er að lengjast, en lengst var það árið 2020 þegar það náði yfir 66 daga.
Í ár voru skráðar 3015 pysjur eins og áður sagði, það þýðir að frá árinu 2003 hafa 49.565 pysjur verið skráðar í eftirlitið frá upphafi. Að meðaltali hafa þá 2.328 pysjur verið skráðar árlega síðustu 20 árin. En ef við skoðum sérstaklega síðustu 10 árin, hafa að meðaltali verið skráðar 3.814 pysjur á ári, sem þýðir að í ár voru pysjurnar 18% færri en að meðaltali í þessi 10 undanfarin ár. Mestur hefur fjöldi pysja á einu ári verið 7.706 árið 2019, en fæstar voru þær árið 2010 þegar aðeins 10 pysjur voru skráðar.
Meðalþyngdin í ár var 253.5 grömm, sem er aðeins lægra en síðstu tuttugu árin þegar meðalþyngdin var 265.4 grömm, en það er innan 5% marka og því er munurinn ekki marktækur.
Flestar pysjur fundust þann 7. september, sem staðfestir seinkun á flugi pysjanna. Náttúrustofa Suðurlands fylgdist með varpinu og fjölda og þyngd pysja í lundabyggðinni í Stórhöfða í sumar. Miðað við þær athuganir hefði hápunkturinn í fjölda pysja átt að vera um miðjan til loka ágústmánaðar. Þessi seinkun er talin vera tilkomin vegna fæðuskorts á síðasta vaxtarstigi pysjunnar, en það sama gerðist einnig í fyrra.
