Fulltrúar strandríkjanna sem eiga hagsmuni af uppsjávarveiðum í norðaustur Atlantshafi hafa komist að samkomulagi um hámarks heildarveiði á síld, kolmunna og makríl fyrir næsta ár. Samkomulag er ekki um skiptingu kvótans innbyrðis á milli landanna frekar en oft áður. Þetta kemur fram í frétt á vef Fiskifrétta.
Fundirnir fóru fram 17. og 18. október í London. Samkomulag náðist um að fylgja ráðgjöf Alþjóðahafrannsóknaráðsins upp á samtals tæp 740 þúsund tonn af makríl á næsta ári, þar sem hlut eiga að máli Ísland, Evrópusambandið, Færeyjar, Grænland, Noregur og Bretland, en kvótinn er 782 þúsund á yfirstandandi ári.
Noregur, Rússland, Bretland, Færeyjar og Ísland náðu samkomulagi að fylgja ráðgjöf ICES hvað varðar síld sem hljómar upp á 390 þúsund tonn á næsta ári sem er 24% samdráttur frá þessu ári.
Að lokum náðu Noregur, Evrópusambandið, Bretland, Færeyjar og Ísland samkomulag um að fylgja ráðgjöf ICES um tæplega 1.530.000 tonn hámarksveiði á kolmunna á næsta ári sem er 13% aukning frá yfirstandandi ári.
Veiðar langt umfram ráðgjöf
Það er ekkert nýtt að þjóðirnar nái samkomulagi um að fylgja ráðgjöf ICES en öðru máli gegnir um innbyrðis skiptingu kvótans milli strandríkjanna. Af þeim sökum hafa veiðar farið langt umfram ráðgjöf mörg undanfarin ár. Ofveiði sem af þessu hefur hlotist hefur leitt til þess að stór fyrirtæki eins og fóðurframleiðandinn Biomar og netsölurisar eins og Young‘s og Asda hafa heitið því að kaupa ekki uppsjávarfisk af þessum tegundum takist strandríkjunum ekki að komast að samkomulagi um skiptingu sín á milli.
Cecilie Myrseth, nýskipaður sjávarútvegsráðherra Noregs, segir mikilvægt að strandríkin setjist að nýju að samningaborði, ekki síst til að finna leið til að semja um skiptingu á makrílkvótanum en makríll hefur vegna þrákelkni strandríkjanna og ofveiðinnar misst MSC vottun. Ekki hefur verið samkomulag um skiptingu makrílkvótans síðan 2020.
