Arnar Sigurmundsson, fyrrverandi framkvæmdastjóri, hlaut Fréttapýramídann 2024 fyrir framlag sitt til félagsmála, menningarmála og atvinnulífs í Vestmannaeyjum og á landsvísu um áratuga skeið.
Arnar fæddist í Vestmannaeyjum 19. nóvember 1943. Hann lauk gagnfræðaprófi frá Gagnfræðaskóla Vestmannaeyja 1960 og fór að því loknu að vinna í fiski, hjá Kaupfélagi Vestmannaeyja og síðan við heildverslun Heiðmundar bróður síns, H. Sigurmundsson hf., frá 1965 fram að gosi. Þar vann Arnar við sölumennsku, innheimtu og umboð Samvinnutrygginga.
Arnar varð starfsmaður Viðlagasjóðs í byrjun mars 1973 þegar hann var á 30. aldursári. Hann var framkvæmdastjóri sjóðsins í Vestmannaeyjum frá september 1973 og fram í mars 1977. Viðfangsefnin voru ærin. Fyrst var áhersla á að verja byggðina og höfnina, svo tók við hreinsun Vestmannaeyjabæjar og mat á tjóni sem eldgosið olli.
Hann var framkvæmdastjóri Samfrosts sf., þjónustufyrirtækis frystihúsanna í Eyjum, frá 1977 til 1992 og formaður Samtaka fiskvinnslustöðva (SF) 1987 til 2014. Arnar tók þátt í sameiningu SF og LÍÚ í Samtök fyrirtækja í sjávarútvegi (SFS) árið 2014.
Arnar settist í stjórn Lífeyrissjóðs Vestmannaeyinga 1980, síðar Lífeyrissjóðs Vestmannaeyja, og sat þar nær samfleytt til 2017. Hann átti sæti í stjórn Landssamtaka lífeyrissjóða frá stofnun 1998 og til 2017, var formaður 2006-2012. Arnar var talsmaður lífeyrissjóðanna þegar bankakerfið féll haustið 2008 og í eftirleik þess. Hann sat oft fyrir svörum í fjölmiðlum og svaraði ávallt af yfirvegun og festu, sagði aldrei meira en efni stóðu til.
Sat 270 bæjarstjórnarfundi
Arnar var formaður Nýsköpunarsjóðs atvinnulífsins 1997-2004, stjórnarmaður í Vinnuveitendasambandi Íslands og síðar í stjórn Samtaka atvinnulífsins (SA) til 2015 og ráðgjafi SA í lífeyrismálum. Sem slíkur kom hann að gerð fjölda kjarasamninga.
Hann var stjórnarformaður Visku frá stofnun 2003 til 2023, í stjórn Þekkingarseturs Vestmannaeyja frá stofnun 2008, þar af formaður 2018-2023, í stjórn Sparisjóðs Vestmannaeyja um árabil og formaður stjórnar 1992-2000. Arnar hefur staðið fyrir námskeiðum um átthagana, meðal annars um húsin sem hurfu undir hraun. Einnig hefur hann haldið erindi um þau, svo fátt eitt sé nefnt. Arnar var í stjórn Eyverja 1964-1977 og bæjarfulltrúi fyrir Sjálfstæðisflokkinn 1978-1986 , 1995-1998, 2002-2006 og varamaður í bæjarstjórn í fjögur kjörtímabil. Hann sat 270 bæjarstjórnarfundi á árunum 1974-2009. Aðeins fjórir bæjarfulltrúar hafa setið fleiri bæjarstjórnarfundi en Arnar frá því að Vestmannaeyjabær fékk kaupstaðarréttindi 1919.
Arnar var formaður Taflfélags Vestmannaeyja 1962-1964 og aftur 50 árum síðar, 2015-2021. Hann hefur lengst af verið virkur í starfsemi félagsins og fjórum sinnum orðið Skákmeistari Vestmannaeyja.
Arnar hefur verið í ritnefnd Fylkis frá 1992 og ritstjóri jólablaðs Fylkis. Hann er einn af stofnendum Eyjaprents sem sameinaðist Fjölsýn í Eyjasýn ehf., útgefanda Frétta/Eyjafrétta, og í stjórn félagsins um langt árabil. Guðni Einarsson. Mynd Addi í London.
