Leikfélag Vestmanneyja er á fullu þessa stundina að undirbúa leikverkið Spamalot. Spamalot verður frumsýnt þann 28. mars nk.
Við fengum nokkra leikara til þess að svara nokkrum spurningum og gefa smá innsýn í leikritið.
Leikfélag Vestmannaeyja á facebook
Sigurhans Guðmundsson – Artúr konungur 
Aldur? 44 ára.
Hversu mörgum verkum hefur þú tekið þátt í? Allavega 10 verkum.
Hvenær byrjaðir þú í Leikfélagi Vestmannaeyja? Á síðustu öld eða 1995.
Hvert er hlutverk þitt í Spamalot? Artúr konungur.
Hvernig gengur að samræma einkalíf og leikhúslíf? Bara vel, aldrei verið vandi að pússla því saman.
Hvað stendur upp úr í undirbúningi? Gaman að æfa með skemmtilegu og hressum krökkum, flottur leikstjóri og ekki má gleyma gamalmenninu honum Zindra hann er ágætur líka.
Er spenna fyrir frumsýningunni? Alltaf gríðarlegur spenningur fyrir frumsýningu, já og öllum sýningum.
Hvernig myndir þú lýsa Spamalot? Spamalot er ógeðslega fyndið og fullt af fjöri, stanslaust stuð. Ef þér langar að hlæja vel og hafa góðar stundir þá er þetta eitthvað sem þú munt ekki vilja missa af.
Eitthvað að lokum? Nei held bara ekki.
Ingunn Silja Sigurðardóttir – Vatnadísin
Aldur? Ég verð 28 ára í ágúst.
Hversu mörgum verkum hefur þú tekið þátt í? Spamalot er sjötta verkið sem ég tek þátt í, ég tók þátt í þremur verkum þegar ég var barn en tók mér síðan 10 ára pásu áður en ég kom aftur og tók þátt í Rocky Horror.
Hvenær byrjaðir þú í Leikfélagi Vestmannaeyja? Ég byrjaði árið 2007 þegar leikfélagið setti upp Bláa Hnöttinn.
Hvert er hlutverk þitt í Spamalot? Ég fer með hlutverk Vatnadísarinnar, aðal dívunnar í verkinu sem vill að allt snúist um hana.
Hvernig gengur að samræma einkalíf og leikhúslíf? Það gengur bara ágætlega, konan mín er dansari í verkinu ásamt því að vinna í sviðsmyndinni þannig við erum mikið saman í leikhúsinu sem er frábært, svo er ég í þægilegri vinnu með frábæran yfirmann sem kemur til móts við mig hvað varðar vaktir.
Hvað stendur upp úr í undirbúningi? Það er klárlega andinn í leikhúsinu, allar æfingarnar hafa verið svo skemmtilegar og allir hressir og til í að vera með í þessu verki, svo verð ég að segja að mér finnst frábært að fá að syngja mikið því ég elska að syngja þannig þetta kemur allt vel saman.
Er spenna fyrir frumsýningunni? Já það er rosaleg spenna, mér finnst tíminn líða svo hratt þegar æfingatímabilið stendur yfir og svo bara BAMM frumsýning haha.
Hvernig myndir þú lýsa Spamalot? Spamalot er söngleikur sem inniheldur mikið af gríni og hentar fyrir 13 ára og eldri. Verkið er byggt á Monty Python and The Holy Grail fyrir þá sem þekkja þá kvikmynd og ég verð að segja að ég hef hlegið mikið yfir sumum atriðum sem við höfum æft þannig ég vona að áhorfendur hafi gaman af þessu.
Eitthvað að lokum? Líttu alltaf á lífsins björtustu hlið.
Alexander Páll Salberg – Sagnfræðingurinn og Herbert prins
Aldur? 35 ára .
Hversu mörgum verkum hefur þú tekið þátt í? Úff, er löngu hættur að telja. Þau eru orðin fjandi mörg.
Hvenær byrjaðir þú í Leikfélagi Vestmannaeyja? Það var á því herrans ári 2003.
Hvert er hlutverk þitt í Spamalot? Ég fæ þann mikla heyður að leika Sagnfræðinginn (sá sem segir söguna) og Herbert prins
Hvernig gengur að samræma einkalíf og leikhúslíf? Mjög vel… á meðan ég man að skila Glanna glæp eða Tímon eftir uppí leikhúsi þá er frúin sátt.
Hvað stendur upp úr í undirbúningi? Við þessu er bara til eitt svar hjá mér en það er Bertha… meiri snilling er ekki hægt að finna.
Er spenna fyrir frumsýningunni? Heldur betur… hef beðið eftir þessu frá 2020.
Hvernig myndir þú lýsa Spamalot? Spamalot er ein stór hláturs bomba. Við sem erum að leika og leikstjórinn sjálfur höfum oft mikið hlegið af þessari vitleysu. Hver vill ekki mæta og hlæja stanslaust í tvo tíma eða svo ?
Eitthvað að lokum? Hlakka til að sjá ykkur hinum megin !
María Fönn Frostadóttir – Riddari
Aldur? 18 ára.
Hversu mörgum verkum hefur þú tekið þátt í? Þetta er 8. verkið sem ég tek þátt í.
Hvenær byrjaðir þú í Leikfélagi Vestmannaeyja? Ég tók þátt í mínu fyrsta leikriti 2017 þegar ég var 12 ára .
Hvert er hlutverk þitt í Spamalot? Ég er einn riddarana sem segja “Ní!”.
Hvernig gengur að samræma einkalíf og leikhúslíf? Það gengur bara furðu vel hingað til.
Hvað stendur upp úr í undirbúningi? Þetta er rosalega stuttur tími til að undirbúa sýningu en þetta gengur eins og í sögu hjá okkur, enda er þetta sterkur hópur.
Er spenna fyrir frumsýningunni? Spennan er gríðarleg.
Hvernig myndir þú lýsa Spamalot? Þetta er brjálæðislega fyndið leikrit, mikil vinna búin að fara í þetta meistaraverk og ég hvet alla til að koma og horfa á!
Eitthvað að lokum? Ekki missa af þessum gullmola.
