Við höldum áfram að kynna og taka púlsinn á þeim sem taka þátt í leiksýningunni Spamalot. Að þessu sinni eru það þær Valgerður Elín og Svala sem svara nokkrum vel völdum spurningum.
Valgerður Elín Sigmarsdóttir dansari og búningahöfundur
Aldur? 20 ára.
Hlutverk þitt í Spamalot? Ég er hluti af dönsurum sem kallast karamellusystur og hanna og sauma búninga.
Hefur þú áður tekið þátt í leikhúsverki? Ég hef verið í leikhúsinu síðan í Klaufum og kóngsdætrum árið 2017 og hef tekið þátt í öllu sem ég mátti vera með í síðan þá, á sviði eða á bakvið tjöldin, til dæmis í Ávaxtakörfuni sem Gedda, Rocky Horror sem Janet og Gosa sem álfadís. Það eru þá 9 verk í heildina, ef við teljum með uppsettninguna á Spamalot sem fór aldrei á svið vegna covid, og þá er þetta mitt 10. verk.
Hvernig gengur að læra dansana? Ég hef aldrei lært svona flókna og marga dansa áður, þetta er bara ótrúlega skemmtilegt að hafa fyrir því að læra og framkvæma dansana því að þetta er þrek bæði fyrir líkamann og hugann. Við dansararnir æfum á sér æfingum með frábærum danshönnuðum, síðan æfi ég mig heima þegar mér gefst tækifæri til og svo í lokin æfum við með öllum leikhópnum.
Hefur þú lært dans eða er þetta áhugamál? Það nálægasta sem ég get kallað það að hafa lært dans er bara að hafa verið í dans tímum í grunnskóla hjá Súsönnu. En síðastliðin ár hefur áhugi minn á dansi vaxið í gegnum leikfélagið og finnst mér mjög skemmtilegt bæði að dansa og horfa á dans.
Ertu að læra eitthvað sem þú hefur ekki gert áður? Eins og ég nefndi fyrir ofan þá hef ég aldrei lært svona flókin eða hröð spor áður sem taka jafn mikið á. Svo er ég að læra í fyrsta sinn að sveifla “flail” og að notast við lyftur í dansi.
Hvað er skemmtilegast við þetta verkefni? Það skemmtilegasta hlýtur að vera félagskapurinn, hreyfingin, áreynslan og það að hafa fyrir slíku verkefni til þess að fá svo að uppskera það á sýningum.
Hvernig mydir þú lýsa Spamalot? Spamalot er mjög fyndið í gegn með nóg af lögum og dansatriðum inn á milli og ef það var ekki nóg þá ber það líka fallegan boðskap.
Eitthvað að lokum? Allir að skella sér í leikhús á þetta frábæra verk! Frumsýnum um páskana!
Svala Hauksdóttir dansari
Aldur? Ég er tvítug .
Hlutverk þitt í Spamalot? Ég er Karamellusystir sem er mjög fjölbreytt hlutverk. Við erum að dansa í nánast öllum danssenum og einnig fáum við að vera Ní riddarar ásamt öðrum hlutverkum.
Hefur þú áður tekið þátt í leikhúsverki? Já, hef tekið þátt í verkum síðan 2016 hér í leikfélaginu. Það sem stendur upp úr er Rocky Horror þegar ég var dansari, það var eitt af skemmtilegustu verkunum. Tímabilið einkenndist af mjög góðum leikhóp og það var alltaf gaman á æfingum, einnig rættist stór draumur að fá að sýna á sviðinu í Þjóðleikhúsinu.
Hvernig gengur að læra dansana? Mér finnst ganga bara sjúklega vel að læra dansana, það eru sum flókin spor á köflum og erum við duglegar að mæta fyrir æfingar að hita upp með dönsunum. Einnig renni ég yfir sporin heima af og til.
Hefur þú lært dans eða er þetta áhugamál? Ég hef bara lært dans í grunnskóla og á námskeiðum. En þetta er mjög skemmtilegt áhugamál sem þróaðist út frá því að vera í leikfélaginu. Mér finnst mjög gaman að dansa.
Ertu að læra eitthvað sem þú hefur ekki gert áður? Þetta er ekkert svo nýtt fyrir mér, ég var með þetta sama hlutverk þegar við ætluðum að sýna Spamalot fyrir Covid. Höfum bara aðeins verið að læra ný spor, það er alltaf gaman að læra ný spor.
Hvað er skemmtilegast við þetta verkefni? Það er félagsskapurinn í danshópnum og að fá að vera mjög mikið á sviðinu að dansa, ég nýt mín svo mikið að vera á sviði og dansa.
Hvernig mydir þú lýsa Spamalot? Ég myndi lýsa Spamalot sem grín eða gaman söngleik.
Eitthvað að lokum? Já, ég hvet bara alla að mæta og sjá þetta stórkostlega verk sem við erum búin að vera vinna hörðum höndum að.
