Kvennalið ÍBV gerði sér lítið fyrir og burstaði Selfoss þegar liðin mættust á Hásteinsvelli í dag. Leikurinn var úrslitaleikur um efsta sæti B-riðils 1. deildar en bæði lið voru örugg í úrslitakeppnina. Eyjastúlkur unnu 6:0 en staðan í hálfleik var 3:0. ÍBV endaði því í efsta sæti B-riðils og mætir Keflavík í undanúrslitum um lausu sætin tvö í úrvalsdeild næsta sumar. Leikið verður heima og heiman gegn Keflavík og verður byrjað í Keflavík næsta laugardag en heimaleikur ÍBV verður á miðvikudaginn.