Það ráku margir upp stór augu á bryggjunni nú í morgunsárið við þessa sjón. En hér er á ferðinni skipið Maud sem norski landkönnuðurinn Roald Armundsen sigldi frá Noregi yfir Norðuríshaf.
Skipið var byggt fyrir Roald árið 1917 skömmu áður en hann hélt í sinn annan rannsóknaleiðangur norður á bóginn. Sigldi hann svokallaða norðausturleið, milli Atlantshafs og Kyrrahafs, þar sem stærstur hluti leiðarinnar er um ísilagt Norðuríshafið.
Leiðangrinum lauk árið 1924 og dagaði skipið uppi í Alaska og var ári síðar selt sem úr þrotabúi Armundsen. Það var síðan nýtt sem flutningaskip eftir norðurströnd Bandaríkjanna og Kanada. Í framhaldinu var það nýtt sem geymslurými auk þess að hýsa útvarpsstöð allt þar til Maud sökk árið 1930 við norðurströnd Kanada.
Skipið lá á hafsbotni næstu 85 árin en var svo dregin á flot árið 2016 og ákveðið að koma því heim til Noregs.
Jan Wanffaard, sem stýrir leiðangrinum, sagði í viðtali á RÚV, það góða tilfinningu að ferja skipið heim. „Mér finnst sem að Maud sé Amundsen. Hann hefur verið á burt, hann hvarf. Og nú heldur hann heim á leið. Svo einfalt er það. Mér finnst að Amundsen fái þarna endurheimt orðsporið vegna þess sem gerðist undir lok ævi hans. Ég vona að Norðmenn taki þessu höndum tveim.“
Myndirnar hér að neðan tók Óskar Pétur af Maud við Bryggju nú í morgun.
Fyrir áhugasama má svo lesa frekari upplýsingar um verkefnið og sögu skipsins í blaði sem gefið var út um verkefnið.
