Ein líkamsárás var kærð eftir skemmtanahald helgarinnar og átti árásin sér stað aðfaranótt 5. janúar sl. Þarna höfðu tveir menn ráðist á þann þriðja þannig að sá sem fyrir árásinni varð fékk bólgur í andlit og glóðarauga. Málið er í rannsókn, segir í tilkyningu frá lögreglu.
Laust eftir hádegi þann 5. janúar sl. var lögreglu tilkynnt um innbrot inn á veitingastaðinn Lundann. Þarna hafði verið farið inn um glugga á austurhlið með því að spenna hann upp. Einnig var gluggi í hurð á jarðhæð brotinn. Reynt var að brjótast inn í einn spilakassa sem er á efri hæð staðarins en það tókst ekki. Að morgni 7. janúar sl. var karlmaður á fertugsaldri handtekinn grunaður um innbrotið og við skýrslutöku viðurkenndi hann að hafa brotist inn á Lundann. Málið er í rannsókn en telst að mestu upplýst.
Tvö fíkniefnamál komu upp í liðinni viku og var í báðum tilvikum lagt hald á smáræði af kannabisefnum.
Í byrjun árs er rétt að koma nokkrum tölulegum staðreyndum til almennings og fylgir neðangreind tafla þar sem sýndur er samanburður á milli ára í helstu málaflokkum.
Málaflokkur 2014 2015 2016 2017 2018
Hegningarlög alls 84 119 148 107 91
Kynferðisbrot 3 11 7 13 10
Auðgunarbrot 20 36 63 24 19
Líkamsárásir 20 32 33 27 30
Heimilisofbeldi 0 6 14 10 5
Eignaspjöll 31 30 34 33 19
Fíkniefnabrot 63 90 43 63 54
Áfengislagabrot 13 11 8 15 13
Umferðarlagabrot 146 229 306 268 273
Ölvun við akstur 12 10 5 8 13
Fíkniefnaakstur 9 16 7 6 24
Hraðakstur 3 4 4 6 10
Eins og sjá má þá hefur hegningarlagabrotum fækkað á milli ára og er helsta skýringin á því að auðgunarbrotum hefur fækkað. Ofbeldisbrotum hefur hins vegar fjölgað örlítið.
Mest sláandi eru aukning á akstri undir áhrifum áfengis og ávana- og fíkniefna. Er ljóst af þessu að of margir eru í umferðinni undir áhrifum vímuefna sem verður að teljast áhyggjuefni.