Jón Steinar – Vörubílar eru hans mál:

Jón Steinar, sem á og rekur Braggabíla er yngstur bræðranna þriggja en bílar áttu fljótt hug hans allan. Fetaði sömu slóð og Sigurjón og Darri, lærði bifvélavirkjun og vann með þeim í 17 ár. Breytti um kúrs, keypti sér vörubíl og fetaði í fótspor pabbans, Adolfs Sigurjónssonar. Hann á í dag 6 vörubíla og eru 4 þeirra öflugir og í fullum rekstri. „Ég var eldri en Darri þegar ég fékk mótorhjóladelluna. Sleppti skellinöðrunni, tók stóra stökkið og keypti mér mótorhjól þegar ég var 22 ára,“ segir Jón Steinar um fyrsta mótorhjólið. Bíladellan byrjaði mun fyrr, en hann keypti sér fyrsta bílinn sem var Dodge Dart þegar hann var 16 ára. Voru amerísku bílarnir í uppáhaldi fyrstu árin.

„Ég vann í mörg ár með bræðrunum við málun og réttingar og fann mig ágætlega í því. Það var svo árið 2004 sem ég keypti fyrsta vörubílinn, Volvo sem ásamt Scania hafa verið uppistaðan í bílaflotanum hjá okkur.“

Breytingin er mikil á þessum 20 árum, stærri og öflugri bílar og kranar sem geta lyft mörgum tonnum. „Stór hluti af okkar starfi tengist sjávarútvegi og stærri og afkastameiri veiðarfæri kalla á stærri og öflugri bíla. Sama gildir um kranana. Þeir þurfa bæði að geta lyft miklu og teygt sig langt.“

Öflugir starfsmenn

Jón Steinar hefur tvo öfluga starfsmenn, Kjartan frá árinu 2013 og Tryggva frá árinu 2022.  „Frábærir menn enda veitir ekki af þegar mikið er að gera. Fyrir þann tíma voru það hinir ýmsu  menn sem hjálpuðu okkur yfir stærstu vertíðarnar í síld, makríl og loðnu. Júlía Elsa konan mín hefur svo séð um allt bókhald hjá okkur frá byrjun.

Eftir að við stækkuðum við okkur 2021 hafa verkefnin orðið fleiri. Erum mikið á bryggjunum, vinnum við bátana, trollin og næturnar. Eins gott að hafa góð tæki því stærstu næturnar eru allt að 50 tonn. Við fylgjum þessari þróun og keyptum nýlegan bíl með mjög öflugum krana á síðasta ári. Við sjáum sjálfir að mestu um allt viðhald en vanti okkur aðstoð leitum við til Sigurjóns. Með sérhæfðari viðgerðir á bílunum kemur fyrir að við þurfum að fara til Reykjavíkur. Þegar ég byrjaði var ég á planinu á bak við Braggann og fékk aðstoð hjá bræðrunum þegar á þurfti að halda. Það gjörbreyttist þegar ég keypti húsið við Tangagötu 2016. Þar komum við inn fjórum bílum,“ segir Jón Steinar og er ánægður með hvernig gengur.

„Það er nóg að gera og rúllar fínt. Oft nætur- og helgarvinna á vertíðum. Við erum líka kallaðir til þegar hús eru byggð, hífa steypu og þyngri hluti. Mikið byggt og nóg að gera. Við sjáum líka um allan flutning á dótinu fyrir og eftir  þjóðhátíð inn í Dal sem er meira verk en flesta grunar. Með öllu er þetta mikil fjárfesting en dæmið gengur upp og þá getur maður ekki verið annað en ánægður.

Myndir Óskar Pétur.