Diljá Mist Einarsdóttir, þingmaður Sjálfstæðisflokksins kvaddi sér hljóðs í umræðum um störf þingsins á Alþingi í gær. Þar greindi hún þingheimi frá því að henni hafi borist skemmtileg áskorun frá vöskum stelpum í Vestmannaeyjum á dögunum, frá Söru Rós, Ingibjörgu og Kamillu, um að lengja útivistartíma 10 til 12 ára barna.

„Þeim þótti það bara ekki sanngjarnt að útivistartími þessa aldurshóps væri sá sami og sex ára barna. Þær vildu geta leikið sér lengur úti, verið lengur í sundi og þeim þótti það bara miklu betra en að þær væru heima að hanga í tölvunni og í símanum. Ég var bara svo sammála þeim að nú hefur verið dreift hér á Alþingi frumvarpi frá hópi Sjálfstæðismanna um að lengja útivistartíma barna, bæði þessa aldurshóps en líka lengja almennt reglur um útivistartíma barna í kringum sumarmánuðina.”

Til mikils að vinna að börn eyði meiri tíma úti við og í samvistum við önnur börn

„Á þeim tíma sem er liðinn frá því að við settum reglur um útivistartíma barna í lög hefur margt breyst í íslensku samfélagi. Umræða um skjánotkun barna og mikilvægi þess að takmarka hana er orðin mjög hávær og þá fer hlutfall íslenskra barna sem glíma við offitu vaxandi. Það liggja því lýðheilsusjónarmið að baki þessu frumvarpi okkar um rýmkaðan útivistartíma barna. Það er til mikils að vinna að börn eyði meiri tíma úti við og í samvistum við önnur börn en félagsleg hegðun þeirra hefur tekið stakkaskiptum vegna örra tæknibreytinga, m.a. vegna aukinnar skjánotkunar. Og það er óásættanlegt að íslensk börn séu of feit í samanburði við börn í nágrannalöndunum. Svo ætla ég bara að taka aftur undir með þessum vinkonum mínum í Vestmannaeyjum að það hnígi að því sanngirnisrök að útivistartími þessa aldurshóps sé rýmkaður enn frekar og í landi þar sem er myrkur svo stóran hluta árs og allra veðra von er sömuleiðis mikilvægt að frelsi barna sé rýmkað eins og kostur er yfir mildari mánuði ársins.

Ég vonast til að þessu frumvarpi verði vel tekið hér á Alþingi Íslendinga, a.m.k. betur en nýir stjórnarþingmenn virðast taka í það að hér fari fram eðlileg umræða á Alþingi og vönduð málsmeðferð,” sagði Diljá Mist í ræðustól þingsins í gær.