Aldursmörk fyrir læknisvottorð hækka úr 65 í 75 ár
Þrátt fyrir breytinguna minna stjórnvöld á að áfram gildi meginregla umferðarlaga um að ökumenn skuli á hverjum tíma vera líkamlega og andlega færir um að stjórna ökutæki, óháð aldri. Eyjafréttir/Eyjar.net: TMS

Ritstjórn

frettir@eyjafrettir.is

Eldri ökumenn þurfa framvegis ekki að leggja fram læknisvottorð við endurnýjun ökuskírteinis fyrr en þeir hafa náð 75 ára aldri. Þetta er meðal breytinga á reglugerð um ökuskírteini sem Eyjólfur Ármannsson innviðaráðherra hefur staðfest í samvinnu við heilbrigðisráðuneytið.

Fram að þessu hefur almennt verið krafist læknisvottorðs við endurnýjun ökuskírteina frá 65 ára aldri, en með breytingunni hækkar aldursmarkið um tíu ár.

Samkvæmt ráðuneytunum er markmiðið að einfalda umsóknarferlið og laga reglurnar að breyttum aðstæðum. Bent er á að heilsa fólks hafi almennt batnað samhliða hækkandi lífaldri og að reynslan sýni að læknisvottorð hafi nær undantekningalaust verið veitt við endurnýjun ökuskírteina hjá þessum aldurshópi.

Ábyrgð ökumanna óbreytt

Talið er að breytingin muni draga úr álagi á bæði eldri ökumenn og heilbrigðiskerfið, auk þess sem hún fækki óþarfa vottorðaskrifum hjá heimilislæknum.

Þrátt fyrir breytinguna minna stjórnvöld á að áfram gildi meginregla umferðarlaga um að ökumenn skuli á hverjum tíma vera líkamlega og andlega færir um að stjórna ökutæki, óháð aldri.

Lengri tími til að ljúka verklegu prófi

Fleiri breytingar eru einnig gerðar á reglugerðinni. Þar má meðal annars nefna að umsækjendur um ökuskírteini fá nú allt að tólf mánuði til að ljúka verklegu prófi eftir að hafa staðist bóklegt próf. Áður var sá frestur almennt sex mánuðir.

Jafnframt er nú kveðið á um fimm ára gildistíma starfsleyfa ökuskóla.

Skýrari reglur fyrir atvinnubílstjóra

Í reglugerðarbreytingunni er einnig skýrar kveðið á um að atvinnubílstjórar skuli ljúka endurmenntun fyrir hverja endurnýjun ökuréttinda. Gildistími endurmenntunar verður skráður í ökuskírteini og fylgir gildistíma þess, sem getur verið allt að fimm ár.

Þá hefur verið felld niður krafa um sérstakan búnað í sjálfskiptum kennslubifreiðum sem ætlað var að gera ökukennurum kleift að rjúfa aflrás. Samkvæmt Samgöngustofu hefur þessari kröfu ekki verið framfylgt og kennslubifreiðar almennt ekki búnar slíkum búnaði.

Tillögur að breytingunum voru kynntar í samráðsgátt stjórnvalda í vetur áður en þær tóku gildi.

Nýjustu fréttir

Áhugavert
Áfram Noregur í kvöld – Heimisáhrifin virka
Úr blaði Eyjafrétta
Draumurinn orðinn að veruleika
Áhugavert
Einstakt safn Magnúsar vakti forvitni á Goslokahátíð
Myndband
Þrjár vikur í Þjóðhátíð – uppbyggingin hafin í Herjólfsdal
Áhugavert
Sumarlesturinn hefur aldrei farið betur af stað
Skipulagsmál
Áform um þrjú ný einbýlishús við Reglubraut
Aðsend grein
Evrópusambandið, meira en tollabandalag
Áhugavert
50 ár frá opnun sundlaugar Vestmannaeyja
Mest lesið

Góð ráð fyrir siglingu

Sjóveiki

Hvað er sjóveiki?

Sjóveiki er misræmi milli skynfæra líkamans sem senda boð til heilans um hreyfingu – kyrrstöðu.

Þegar einstaklingur er úti á sjó þá nema skynjarar í vökvafylltum gangi í innra eyra hreyfingu og senda boð til heilans að einstaklingur sé á hreyfingu. Augun senda hins vegar boð til heilans um að viðkomandi sé kyrr. Heilinn á erfitt með að vinna úr þessum misvísandi og ósamræmdu upplýsingum og sendir skilaboð til magans um að tæma sig – þ.e. veldur uppköstum.

Einkenni sjóveiki eru þreyta, ógleði, svimi, svitakóf og uppköst.

Góð ráð til að hindra sjóveiki:

  • Góð hvíld daginn fyrir brottför. Að fara seint að sofa og snemma um borð í bát fer ekki vel saman ef fólk er hætt við sjóveiki.
  • Forðist áfenga drykki daginn fyrir brottför
  • Forðist djúpsteiktan, brasaðan eða saltan mat daginn fyrir siglingu.
  • Borðið góðan morgunverð. Borðið gjarnan hvítt brauð, hafragraut og ávexti þó ekki sítrus ávexti.
  • Forðist mikið koffein. Mikið kaffi er ekki það sem maganum líkar fyrir sjóferð.
  • Hafðu mat með þér á sjó. Gott er að hafa samlokur með kjúklingi eða kalkún. Kjötið er fitusnautt og brauðið er róandi í maga. Hafðu endilega eitthvað til að grípa í sem er létt í maga. Bananar eru mjög góðir til að narta í ef þú finnur fyrir ógleði en einnig er gott að hafa létt kex eða annað sem er ekki salt eða fitumikið.
  • Drekkið vel af vatni en einnig er gott er að drekka kóla drykki eða engiferöl í sjóferðinni

Lyf við sjóveiki þ.e. lyf sem slá á einkennin og fást án lyfseðils í apóteki.

  • Koffínátín – fæst án lyfseðils
  • Postafen – fæst án lyfseðils
  • Scopolamin plástur – lyfseðilsskyltEinnig má fá armbönd gegn ferðaveiki sem sumir telja að hjálpi.

Önnur ráð:

  • Engifer er jurt sem nýlega hefur fengið aukna athygli vegna þess að því er haldið fram að hún geti slegið á ógleði sem fylgir sjóveiki. Til forna tuggðu kínverskir sjómenn engiferrót til að draga úr sjóveiki. Flest lyf sem virka á ógleði verka á heilann en engifer virkar aðeins á magann. Ráðlagt er að taka 1000 mg. hylki hálftíma fyrir brottför. Einnig má taka eitt eða tvö 500 mg. hylki sem eru til viðbótar á ferðalaginu. Ekki er ráðlagt að drekka coke með engifertöflum.
  • Piparminta og te eru einnig gömul húsráð við ferðaveiki.
  • Sumum finnst betra að taka sýrujafnandi töflur, Alminox eða slíkt áður en þú heldur á sjó og þá er gott að hafa box með út á sjó.

Hvar í skipinu er best að vera o.fl.

  • Minna finnst fyrir hreyfingu og veltingi ef maður er staddur næst miðju bátsins.
  • Mörgum finnst gott að vera í kulda, t.d.að vera úti á dekki og láta vindinn leika um sig.
  • Matarlykt fer illa í þá sem hætt er við sjóveiki og einnig pústið frá bátnum.

Þungun:

Þungaðar konur sem þjást af sjóveiki mega nota koffinátín í litlum skömmtum en best er að ráðfæra sig við lækni eða lyfjafræðing.
Þunguðum konum er ekki ráðlagt að nota engifer þar sem það er ekki staðfest hvort það geti haft skaðleg áhrif á fóstur.

Eyjafréttir
Keyrt af  GDPR Cookie Compliance
Friðhelgisyfirlýsing

Þessi vefsíða notar fótspor til að við getum veitt þér bestu notendaupplifun. Upplýsingar um fótspor eru geymdar í vafranum þínum og framkvæma aðgerðir eins og að þekkja þig þegar þú kemur aftur á vefsíðu okkar og hjálpa teymi okkar að skilja hvaða hluta vefsíðunnar þér finnst áhugaverðast og gagnlegast.