„Við fórum af stað í morgun kl 10:00. Hugmyndin var að fara út hérna suður af Eyjum og leita sig svo í austur. Það eru einhver skip búin að leita suðaustur af landinu fyrr í vikunni en þau eru núna komin út í Síldarsmugu. Hef ekki heyrt af aflabrögðum en þetta er bara rétt að byrja og núna þarf að finna hvar fiskurinn heldur sig,” segir Sindri Viðarsson sviðsstjóri uppsjávarsviðs Vinnslustöðvarinnar aðspurður um komandi makrílvertíð.

Spurður um hvaða skip fari á makrílveiðar frá VSV segir hann að það séu Sighvatur, Gullberg og Huginn. „Við getum veitt einhver 14.000 tonn.” Óskar Pétur Friðriksson tók meðfylgjandi myndir í morgun þegar skip Vinnslustöðvarinnar héldu eitt af öðru úr höfn.