Eyjakonan Díana Dögg Magnúsdóttir átti mjög góðan leik með Blomberg-Lippe í þýsku úrvalsdeildinni í handbolta í gærkvöldi þegar liðið sigraði Göppingen 40-22.

Díana Dögg skoraði fimm mörk í leiknum og gaf þrjár stoðsendingar. Andrea Jacobsen sem gengur í raðir ÍBV í sumar skoraði tvö mörk og gaf fjórar stoðsendingar.

Þær eru báðar í lokahóp íslenska kvennalandsliðsins sem leikur tvo leiki gegn Svartfjallalandi í byrjun mars, í undankeppni EM. Díana Dögg missir hinsvegar af fyrri leiknum þar sem hún er að fara í lokapróf.

Blomberg-Lippe situr í 2. sæti þýsku deildarinnar með 28 stig, stigi á eftir toppliði Dortmund.