Kæra hefur verið lögð fram til kærunefndar útboðsmála vegna útboðs Vestmannaeyjabæjar um rekstur heilsuræktar við Íþróttamiðstöð Vestmannaeyja.

Í kærunni er því haldið fram að lykilskilyrði útboðsins séu svo íþyngjandi að þau takmarki verulega samkeppni. Sérstaklega er deilt um kröfu um að bjóðendur hafi að lágmarki 1.000 milljónir króna í eigið fé og að minnsta kosti 5.000 virka áskrifendur.

Málið vekur sérstaka athygli í ljósi þess að fyrra útboð bæjarins um sama verkefni var ógilt og Vestmannaeyjabær talinn bótaskyldur.

Sjá einnig: Kærunefnd hafnar endurupptökukröfu

Tímalína málsins

Mars 2025 – Fyrsta útboðið auglýst
Vestmannaeyjabær auglýsir útboð um rekstur og uppbyggingu heilsuræktar við Íþróttamiðstöð Vestmannaeyja.

2025 – Fyrsta kæra lögð fram
Útboðsferlið er kært til kærunefndar útboðsmála.

Júlí 2025 – Bæjarráð hættir við samningsgerð
Í kjölfar kærunnar ákveður bæjarráð að falla frá samningsgerð og stöðva útboðsferlið.

2025 – Úrskurður kærunefndar
Kærunefnd útboðsmála kemst að þeirri niðurstöðu að Vestmannaeyjabær hafi brotið gegn lögum um opinber innkaup. Ákvörðun bæjarins um val á rekstraraðila er felld úr gildi.

Desember 2025 – Bærinn talinn bótaskyldur
Vestmannaeyjabær er talinn bótaskyldur gagnvart kærendum vegna kostnaðar sem þeir urðu fyrir við þátttöku í útboðinu og honum gert að greiða málskostnað.

Janúar 2026 – Nýtt útboð auglýst
Vestmannaeyjabær auglýsir nýtt útboð um rekstur heilsuræktar með breyttum skilmálum.

Mars 2026 – Ný kæra lögð fram
Sporthöllin ehf. og þrír einstaklingar leggja fram nýja kæru til kærunefndar útboðsmála.
Kærendur gera meðal annars athugasemdir við kröfu um 1.000 milljónir króna í eigið fé og að bjóðendur hafi 5.000 virka áskrifendur.

Nánar verður fjallað um málið næstu daga hér á Eyjafréttum.

Þessu tengt: Strangar kröfur í útboði heilsuræktar vekja ágreining í bæjarstjórn