Vinnslustöðin hf. segir alvarlega stöðu vera komin upp í flutningsmálum til og frá Vestmannaeyjum og að truflanir undanfarnar vikur hafi haft veruleg áhrif á rekstur fyrirtækisins. Í umfjöllun á vefsíðu fyrirtækisins kemur fram að tafir, ófyrirsjáanleiki og röskun á flutningum hafi meðal annars haft áhrif á hráefnisöflun, framleiðslu og afhendingar til viðskiptavina.

Fyrirtækið er nýkomið út úr loðnuvertíð og hefur sett upp afhendingaráætlanir sem nú ganga illa eftir. Þá segir að jafnframt gangi erfiðlega að koma afurðum á markaði, meðal annars saltfiski til Portúgals í þurrkun.

„Áreiðanlegir flutningar eru ekki lúxus – þeir eru grunnforsenda atvinnulífsins í Eyjum,“ segir Björn Matthíasson, rekstrarstjóri VSV Seafood Iceland.

Hráefni berst ekki með eðlilegum hætti

Samkvæmt Sverri Haraldssyni, sviðsstjóra bolfiskssviðs, hefur hráefnisflæði til vinnslu verið óstöðugt.

„Hráefni berst ofan af landi frá skipum VSV, viðskiptabátum og fiskmörkuðum. Flutningar frá Reykjavík hafa brugðist með skömmum fyrirvara og flutningsgeta Herjólfs er takmörkuð og flutningar hægir,“ segir hann.

Þetta leiðir til þess að hráefni berst ekki á réttum tíma og í sumum tilvikum í ójöfnu magni, með þeim afleiðingum að vinnslan hefur ekki alltaf getað verið á fullum afköstum og jafnvel orðið hráefnislaus á köflum.

Skipulag flutninga raskast

Þrátt fyrir mikið umfang flutninga síðustu vikur segir Vinnslustöðin að skipulag þeirra hafi ítrekað raskast. Gámaskip hafi verið send til Vestmannaeyja með stuttum fyrirvara til að „tappa af“ höfninni og flytja gáma annað, í stað þess að fylgja áætlun.

Slíkt rask hefur í för með sér aukinn kostnað og meiri óvissu í rekstri.

Gagnrýna ákvarðanir skipafélaga

Vinnslustöðin gagnrýnir einnig ákvarðanir skipafélaga sem hafa haft bein áhrif á hráefnisflæði til fyrirtækisins.

„Eimskip sleppti viðkomu í Vestmannaeyjum í dag vegna veðurs sem nú er gengið niður – eins og spár gerðu ráð fyrir. Skipið sigldi framhjá Eyjum og það hefði ekki tafið það mikið að koma hér við. Sú ákvörðun hefði hins vegar skipt sköpum fyrir hráefnisflutninga til okkar, sem eru nú í miklum óefnum,“ segir Björn Matthíasson.

Hann bendir jafnframt á að fyrirtækið hafi undanfarið verið að flytja út um 30–35 gáma á viku.

Landeyjahöfn undir gagnrýni

Í umfjölluninni er einnig bent á að vandamál tengd Landeyjahöfn hafi lengi verið þekkt og hafi bein áhrif á flutningsöryggi.

Takmörkuð dýpt og síendurtekin rekstrarvandamál dragi úr áreiðanleika siglinga Herjólfs. Undanfarnar vikur hafi einungis verið hægt að sigla til Þorlákshafnar, sem þýði að ferðum Herjólfs fækki úr sjö á dag niður í tvær. Á viku jafngildir það fækkun úr 49 ferðum niður í 14.

Vinnslustöðin telur óásættanlegt að þessi staða sé viðvarandi, 16 árum eftir að Landeyjahöfn var tekin í notkun, og bendir á ábyrgð Vegagerðarinnar í þeim efnum.

Horfa til stórskipahafnar við Eiðið

Til lengri tíma telur fyrirtækið nauðsynlegt að horft sé til varanlegra lausna í flutningsmálum Vestmannaeyja, þar á meðal uppbyggingar stórskipahafnar við Eiðið.

Slík uppbygging myndi auka flutningsgetu, bæta sveigjanleika og draga úr þeirri viðkvæmni sem núverandi fyrirkomulag hefur í för með sér.

„Grunnforsenda atvinnulífs“

Að mati Vinnslustöðvarinnar ná áhrif óstöðugra flutninga langt út fyrir rekstur einstakra fyrirtækja og snerti atvinnuöryggi og stöðugleika í samfélaginu í heild. „Áreiðanlegir flutningar eru ekki lúxus – þeir eru grunnforsenda atvinnulífsins í Eyjum,“ segir Björn Matthíasson.

Hér má sjá alla umfjöllunina.