Amalia Frøland markvörður kvennaliðs ÍBV í handbolta verður ekkert með í úrslitaeinvíginu um Íslandsmeistaratitillinn gegn Val í úrslitakeppni Olís deildar kvenna.

Amalia meiddist í undanúrslitaleik liðsins gegn Haukum í síðari framlengingu leiksins og var strax ljóst að um alvarleg meiðsli væri að ræða. Það hefur nú komið í ljós að hún er með slitið fremra krossband í hné og verður hún ekkert með næstu mánuðina. 

Amalia hefur verið einn af bestu markvörðum Olís deildarinnar og er því ljóst að þetta er mikið áfall fyrir ÍBV. Ólöf Maren Bjarnadóttir er varamarkvörður liðsins en hún hefur átt frábærar innkomur í úrslitakeppninni og hjálpaði liðinu að komast í úrslitaeinvígið.

Fyrsti leikur ÍBV í úrslitaeinvíginu gegn Val fer fram á Hlíðarenda á laugardaginn kl. 15:00.