Aldan fer nú hækkandi í Landeyjahöfn og því verða aðstæður erfiðari næstu daga. Samkvæmt upplýsingum frá G. Pétri Matthíassyni, forstöðumanni samskiptadeildar Vegagerðarinnar, gera veðurspár þó ráð fyrir að aldan gangi niður á miðvikudag.

„Samkvæmt spánni verður þá veður til dýpkunar fram á laugardag,“ segir Pétur. Á meðan verður dýpkunarskipið Álfsnesið í viðgerð í Þorlákshöfn eftir bilun sem kom upp á dögunum.

„Álfsnesið fer til Þorlákshafnar þar sem ný tjakkastöng verður sett í skipið í stað þeirrar sem bilaði þannig að botnhlerinn sem ekki hefur nýst eftir bilunina komist aftur í virkni,“ segir Pétur.

Um er að ræða einn af átta botnhlerum skipsins sem notaðir eru til að losa efnið sem dælt er upp við dýpkunina.

Samkvæmt Pétri verður unnið hratt að viðgerðinni.

„Viðgerðin verður unnin strax og verður Álfsnesið tilbúið til dýpkunar þegar glugginn opnast aftur á miðvikudaginn,“ segir hann.