Framkvæmda- og hafnarráð Vestmannaeyjabæjar segir skort á lóðum við hafnarsvæðið vera áhyggjuefni og vill að hafnarstjóri leggi fram tillögur um hvernig megi skapa meira rými fyrir atvinnustarfsemi. Samhliða verður kannaður kostnaður við að farga Blátindi VE 21.

Mikið plássleysi er nú á hafnarsvæðinu í Vestmannaeyjum að því er fram kemur í fundargerð framkvæmda- og hafnarráðs.

Ráðið telur brýnt að bregðast við skorti á lóðum og hefur falið hafnarstjóra að vinna tillögur um hvernig auka megi framboð á hafnarlóðum. Annars vegar á að skoða möguleika á að afla nýs landsvæðis og hins vegar að endurskipuleggja núverandi hafnarsvæði þannig að það nýtist betur.

Jafnframt hefur hafnarstjóra verið falið að kanna kostnað við að farga Blátindi VE 21 og upplýsa Minjastofnun um þau áform.

Ekki kemur fram í fundargerðinni hvaða svæði koma helst til greina eða hvaða hugmyndir liggja að baki endurskipulagningu hafnarsvæðisins. Gert er ráð fyrir að hafnarstjóri leggi tillögur fyrir ráðið síðar.