Einhugur, félag einhverfra og aðstandenda þeirra í Vestmannaeyjum, fær HARTS í heimsókn til Eyja dagana 31. ágúst til 2. september. Í heimsókninni verður boðið upp á umfangsmikla fræðslu fyrir nemendur, starfsfólk skóla og fjölskyldur.

HARTS vinnur að fræðslu og verkefnum með áherslu á taugafjölbreytileika, skólatengsl, aðgengi og inngildandi menntun. Markmiðið er meðal annars að auka skilning á fjölbreytileika og stuðla að vellíðan og þátttöku nemenda.

Meðal verkefna HARTS er Skóli fyrir öll, fræðsluverkefni sem fyrirtækið hefur þróað og nú er meðal annars verið að innleiða í grunnskólum Hafnarfjarðar. Verkefnið byggir á faglegri þekkingu og rannsóknum, meðal annars á skólatengslum, og felur í sér fræðslu og vinnu með nemendum, starfsfólki og fjölskyldum.

Að baki HARTS stendur Jóhanna Birna Bjartmarsdóttir, eigandi fyrirtækisins. Hún er með MS-gráðu í Health Education and Behaviour og BA-gráðu í menntavísindum. Auk þess er hún Certified Health Education Specialist (CHES®).