Bergey VE og Vestmannaey VE hafa komið að landi með ágætan afla nú í lok kvótaársins. Rætt er stuttlega við skipstjórana á vef Síldarvinnslunnar. Ragnar Waage Pálmason, skipstjóri á Bergey, upplýsti að Bergey hefði landað í Eyjum í gærmorgun. „Við vorum með rétt tæp 70 tonn og aflinn var mest þorskur. Við hófum túrinn í Meðallandsbugtinni og tókum þar tvo hol. Þá var haldið á Ingólfshöfðann en einungis eitt hol tekið þar. Þá lá leiðin í Berufjarðarálinn þar sem hafði verið ágæt veiði en hún fór minnkandi eftir að við komum. Veitt var í Berufjarðarálnum á meðan bjart var en farið út í kanta þegar dimmdi. Nú er verið að kveðja þetta kvótaár og nýtt að ganga í garð og á þessum tímamótum eru menn bara brattir,” sagði Ragnar.

Birgir Þór Sverrisson, skipstjóri á Vestmannaey, sagði að landað hefði verið í Eyjum í morgun að loknum karfatúr. „Við vorum með um 56 tonn og það var farið allvíða í túrnum. Það var byrjað í Sparisjóðnum, þaðan haldið á Belgableiðuna og síðan á Sneiðina og í Háfadýpið. Undir lokin var veitt í Reynisdýpinu og á Víkinni. Við lönduðum áður fullfermi í Grindavík á sunnudaginn. Þá var aflinn mest þorskur sem fékkst í Berufjarðarálnum þar sem var fínasta veiði. Nú er nýtt kvótaár að ganga í garð og auðvitað eru það alltaf ákveðin tímamót fyrir okkur,” sagði Birgir Þór.