Lokahóf Sumarlesturs Bókasafns Vestmannaeyja verður haldið laugardaginn 29. ágúst kl. 13.00. Þar verður fjölbreytt dagskrá í boði til að fagna dugnaði vestmannaeyskra barna við lesturinn í sumar.

Metþátttaka var í Sumarlestrinum í ár, en alls skráðu 223 börn sig til leiks.

Rithöfundurinn Embla Bachmann mætir á lokahófið, les úr bókum sínum og kynnir jafnframt nýja bók sem væntanleg er fyrir jól.

Dregið verður úr miðunum sem börnin skiluðu inn fyrir hverja lesna bók og fá þau sem skráðu sig í Sumarlesturinn öll glaðning frá Bókasafninu.

Kappakstur á bílabrautum og bílasýning

Þema Sumarlestursins í ár var kappakstur og hefur barnadeild Bókasafnsins verið skreytt í takt við það. Þar má meðal annars finna stóran kappakstursbíl sem vakið hefur mikla athygli í sumar.

Gestir geta spreytt sig á kappakstri á bílabrautum frá síðustu öld og boðið verður upp á myndir til að lita. Þá verður bílasýning á planinu fyrir framan Bókasafnið.

Léttar veitingar verða í boði og eru öll velkomin, segir í tilkynningu frá skipuleggjendum.